[ابو فاروق]

من أرشيف الصفحة: رسالة إلى الرئيس بتاريخ 17 فبراير 2011:

عزيزي الرئيس القادم، شروط عقد العمل الجديد:
- حضرتك ليك عندنا ٤ سنين تورينا فيهم شغلك، عجبتنا نختارك تاني معجبتناش هتمشي
- بعد ٨ سنين عجبتنا معجبتناش هتمشي آه أصل البلد دي خلاص مبقتش عزبة يحكمها حد لحد ما يموت!
- مع كل احترامنا ليك بس صور تاني على الحيطان في المؤسسات الحكومية .. انسى!
- حرمك هي زوجة موظف حكومة .. نظام بقه جمع الفلوس من الحكومة لأعمال الهانم الخيرية مش هياكل معانا!
- ولادك مالهمش علاقة بالمناصب السياسية التنفيذية طول ما حضرتك ريس عشان عندنا حساسية من القضية دي!
- مرتبك هيكون لينا معروف .. وممنوع تدخل في أي شراكات اقتصادية أنت أو عيلتك لحد ما تخرج منها بسلام!
- خد بالك احنا دلوقتي بقينا نفرق بين حقوقنا وأحلامنا .. الانجاز إنك تحققلنا أحلامنا مش إنك تجيبلنا حقوقنا!
- عايزينك دائما بتتكلم مع الشباب وبتناقشهم في ندوات ميكونش رئيس مكتبك اللي مختار اللي يحضرها
- ربنا يكون في عونك عشان تحققلنا اللي كنا مستعدين نموت عشان يتحقق