[Ayman_Nazeih]

الكلاكس اللا إرادى
فيروس خطير اصاب معظم الشعب المصرى
تحول الكلاكس أو التلاكس أو الطياط (طبعاً المسمى بيختلف من شخص لأخر) من ألة تنبيه الى وسيلة ازعاج واصبح استخدمها لا إرادى بدون اى اسباب.
طبعاً المرض ده متفشى فى كل سواقين الميكروباص والنص نقل وغالبية سائقى التاكسى والموتوسيكلات والفيسب لحد ما وصل للملاكى.
المهم انى حاولت كتير انبه بعض السائقين بطريقة محترمة وزوق ولكن المفاجاة ان معظمهم مقتنع ان اللى بيعمله ده هو الصح.
مره كنت راكب مع سواق تاكسى وقعد يزمر للعربية اللى قدامه لغاية لما عدى منها بالرغم من إن العربيه كانت فى حارة تانية ومش معترضة طريقه نهائى فحاولت اوجهه او اسأله عن سبب كلاكساتة الكتيرة للعربية اللى ماشية بعيد عنه ربما يكون بابه مفتوح او عنده عجله نايمه أو أى حاجة تانية انا مش شايفها بس لقيت الرد مختلف تماما عن كل توقعاتى ولقيته بيقولى بصحصحه يابيه علشان ياخد باله وميفكرش انه يكسر عليا ،،،،طبعاً بلعتها وقولت وجهة نظر برده بس الغريب انه عمل نفس الحركة بس مجموعة كلاكسات متقطعة بين كل كلاكس والتانى 3 ثوانى والداهية ان ماكانش حد ماشى فى الشارع خالص غيرنا ....طبعاً سألته باستغراب عن استخدامة للكلاكس وطبعا رد وقالى بسلى نفسى.... المهم بعد حوار طويل لم اصل معاه لنتيجة او حل.
ياريت يا جماعة اللى عنده حل أو اقتراح او علاج للمرض اللا ارادى ده يتفضل يشارك معانا ويمكن من هنا تبدأ حملة توعية وربنا يجعلنا سبب فى الحد من انتشار هذا الوباء .
وكمان حتى لو حد فينا اتنقله العدوى يلحق يتعالج