[truss]

أولاً الف مبروك على العربية,

ثانياً: لما نجيب عربية مستعملة يستحسن تغيير الفلاتر : فلتر البنزين - فلتر الهواء - فلتر الزيت(مع تغيير الزيت).
تغيير طقم البوجيهات , الميكانيكى المفروض يبص على السيور (سير الكاتينة - سير الدينامو - سير التكييف ان وجد) لو فيه حاجة عايزة تتغير.
الكشف على اجزاء الفرامل (التيل - الطنابير - زيت الفرامل)
الكشف على العفشة و تربيطها ان لزم الامر عند عفشجى
الكشف على منسوب زيت باور الدريكسيون (ان وجد) و تزويده اذا لزم الامر.

ثالثاً : عشان تحافظى عليها كل اسبوع تكشفى على منسوب زيت الموتور كل اسبوع مع الكشف على منسوب مياه الردياتير و تزويدهم ان لزم الامر , و بالمرة تبصى على مستوى زيت الفرامل, و فحص ضغط الهواء فى الكاوتش عند بتاع كاوتشات.
كذلك يفضل تسخين العربية قبل التحرك بها فى الصباح لمدة دقيقتين مثلاً.

بالنسبة للغسيل يفضل مرة كل 3 اسابيع او شهر و تتغسل بمياه و صابون و يكون الغسيل فى الظل بعيد عن الشمس.

اما موضوع الزيت يا ريت حضرتك تقوللى نوع العربية و موديلها و ماشية كام كيلو عشان نقدر نحددلك افضل انواع زيوت و يتغير كل أد ايه.

اكسسوارات العربيات موجودة فى كل مكان , اشهر الاماكن شارع دمشق فى مصر الجديدة و سوق التوفيقية فى وسط البلد , و دلوقت محلات السوبر ماركت الكبيرة بقى فيها قسم مخصوص لاكسسوارات العربيات.

اهم حاجات تبقى معاكى فى العربية : كوريك , مفتاح او صليبة لمسامير العجل للظروف الطارئة, طفاية حريق, زجاجة مياه ردياتير احتياطى , فوطة للتنضيف , قفل للدريكسيون لحمايتها من السرقة الى حدٍ ما.

و اى استفسارات اخرى تحت امرك.