متضايقش نفسك يا باشا والحمد لله على كل شىء وبإذن الله كل الحاجات ديه تكون بسيطة خالص وتتحل فى الصيانة الاولى وتستمتع بالعربية من غير مشاكل
وناس كتير بتصادف مشاكل زى كده فى عربيتها فى ال 5000 كم الاولى وكلها سهلة الاصلاح وبتنتهى تماماً وتنساها بعد كده
انا اول ما جبت العربية كان فيه فيوز محروق راكب وكان فاصل الكاسيت والولاعة والاريال وكانت حاجة سخيفة جداً انى امشى بالعربية من غير كاسيت ولا حتى راديو ولا ولاعة وهى لسه زيرو بس دلوقتى خلاص كلة اتنسى
ده غير ترصيص العربية والجنوط والكاوتش اللى كانو جايين معاها واللى لفيت حوالين نفسى ميت مرة بسبب مشاكلهم وفى الاخر غيرت طقم الجنوط والكاوتش كله وريحت دماغى
فالقصد ان ساعات بتبقى فيه حاجات هايفة بتدايق جامد فى بداية علاقتك بالعربية لكن سرعان ما بتتحل وتتنسى
اهم حاجة بس تكتب كل ملاحظاتك عن العربية والمشاكل اللى انت لقيتها فيها وتديها لهم فى التوكيل فى اول صيانة ومتمشيش الا وانت مستلم كل حاجة شغالة ان شاء الله العربية تبات وطبعا يستحسن تروح بدري يوميها وتختار يوم مفيش فيه زحمة جامدة
الف مبروك على العربية وربنا يهديهالك كده ويقيك شرها ويهبك خيرها وتفرح بيها بإذن الله بدون مشاكل
وكل سنة وحضرتك طيب