أخوكم إبراهيم أبوزيد ( GMAGM )
ضيف جديد بالمنتدى بس جديد برده فى العربيات
كان عندى كتكوته صغيره موديل 71 كحلى 1100 cc كانت أول حظى فى العربيات بس حسبى الله ونعم الوكيل
المهم ربنا تاب عليا منها ومن مشاكلها الكتييييييييييييييييييييي ييييييييييييييييييييييييي ييييييييييييييييييييير
ورزقنى بعفريته صغيره برده fiat128 بس بيضاء والحمد لله بيضاء مثل نيتى وربنا عالم بيها
يعنى ماليش فى اللوع ومبعرفش أخون إللى بيكلمنى يعنى زى مابيقولو طيب (
زبون )
المهم طلعت فبريكه فى كل حاجه الحمد لله فيما عدا الماتور زعلان زعلان زعلان
بعد أسبوع من شرائها فوجأت بحراره بعيد عنكم فى الطالع بدون نازل خالص المهم أروح للميكانيكيه ( المناشير )
عفوا يقولى الماكنه أفشه ومحتاجه عمره أقوله كامله ولا نص عمره يقولو مافيش حاجه إسمها نص ولا ربع إلا فى الكباب
ومحدش عايز يعرفنى حدود التكاليف إلا لما نفتح ونشوف المعده فيها أيه المهم واحد منهم قاللى شوف الريداتير ودوره المايه
حليت الريداتير وإتسلك وغيرت الزيت وغيرت فلتر وغيرت ساعه حراره وتمام
المهم طبعا مابمشيش بالعربيه إلا والمروحه شغاله يدوى بالمفتاح
تانى يوم الحراره زى ماهيه فى الطالع والماكنه كل شويه تبطل المهم فجأه الماكنه فيها صوت زى صوت العربيات النقل ( الديزل ) واحد قاللى ريح التاكيهات
الميكانيكيه قالو يبقى السبيكه والفلنشه وتتخرط وعامود كرنك وصبابات المهم قلت لا حول ولا قوه إلا بالله طيب فجأه ونا بدور العربيه مش عايزه تاخد نقله خالص وكل لما أدوس دبرياش الماكنه كلها بتترج فى الدواسه ومافيش أى غيار
المهم روحت للراجل بتاع الفيتيس قاللى دسك وإسطوانه وبليه وغيرتهم المهم قاللى خاللى الميكانيكى يجيى يشوف عامود الكرنك ده بيروح وبييجى معايه قبل ما آقفل الماتور المهم الميكانيكى عمل مشغول وقاللى ماهيه عمره كامله يعنى عمره كامله المهم العربيه خدت النقلات بس الحراره لسه فى الطالع لدرجه إنى راكنها من شهر بس بدورها كل يوم وبروح الشغل على رجلى إللى ليها قصه طويله مع العمليات والعلاج الطبيعى
المهم واحد إبن حلال قاللى هات ماكينه إستيراد وريح نفسك من الميكانيكيه والخراطين وقطع الغيار
لذا نداء من أخوكم الفقير إللى الله هل أروح بورسعيد وماكينه جديده ولا أعمل عمره ولو ماكينه جديده إجرئاتها فى المرور أيه والماكينه بكام وهتحتاج أيه تانى بعد ماتيجى
معلش طولت عليكم