دى مبرراتى لاختيار مرشحى قولى انت ايه مبرراتك؟؟
انا اخترت الفريق ..للمبررات الاتيه وهى طبعاً مبرره..- لانه قال ان اختيار الناس للمناصب حيكون على اساس الخبره.. بدليل انه عين قرايبه وزملائه اللوءات والعمداء السابقين فى وزارة الطيران المدنى بمرتبات خرافيه بلغت9 مليون جنيه شهريا.
- لانه قال انه حيقنن اوضاع الذين بنو على الارض الزراعيه خلال الثوره ..وبما انى بنيت على قطعة الارض اللذى تركها لى ابى فمن مصلحتى ينجح الفريق.
- لانه راجل اقتصادى حيطور مصر ..بدليل قام ببناء "مول تجاري" أمام صالة الوصول رقم 3 بالمطار القديم بتكلفة 100 مليون جنيه ولم يحقق أية إيرادات وفشل المشروع التجارى في مطار شرم الشيخ وكمان قام بيع طائرتي مصر للطيران الجامبو العملاقة بمبلغ مليوني جنيه، وهذا المبلغ لا يساوي ثمن محرك الطائرتين.
- لأنه منع اى محاولة لكشف الفساد بالقوة كالتي مورست فى نقابة الصحفيين من جماعات المجتمع المدني الشريفة..
- لانه لايعترف ان فيه ثوره حصلت من الاساس وبيتريق على شباب الثوره وبيقول حيجيب ليهم بنبونى ..
- لانه امتداد لحكم مبارك وبيقول انه استاذه وقدوته يعنى حيحكم بنفس اسلوبه وطريقته فى افقار الشعب واغناء اتباعه ومعارفه ومؤيديه ومش مهم توزيع ثورة مصر بالعدل على المصريين.
- لانى مش هاممنى حق البنت الطيبه اللى خرجت من بيتها تشتغل عشان ابوها خلاص مش قادر يصرف عليها ولايجوزها..وبتشتغل من الفجر للعشاء عشان تقبض جنيهات وصاحب الشغل يكسب ملايين ويزود ثروته .
- لأ نى بحب غشم وجبروت أمن الدوله وقانون الطوارئ اللى استبدلوه بالضبطيه القضائيه لافراد الجيش يعنى اى فرد من الجيش يقدر يوقفك ويفتشك ويقبض عليك بمناسبه وبدون مناسبه من غير اعتراض ولو اعترضت تاخد على قفاك..ويتقبض عليك برضه.
- لانى مش عايز حق دم المصرى البسيط اللى خرج يقول لأ ومعهوش حتى قصافه فدهسته عربية أمن مركزى..
- أنا بأه معايا فلوس وباشتغل فى وظيفه محترمه ومشترك فى نوادى وبشرب ميه معدنيه وعندى كمان فلتر مستورد وبشترى أغلى فاكهه وأحسن خضار وبجيب العيش أبونص جنيه والديب فريزر مليان لحمه ومعنديش أى مشكله لو كيلو اللحمه بقى ب100 جنيه برضه حقدر اجيبها
- بس عندى مشكله بسيطه ان ضميرى واجعنى وعارف انى لما اموت ربنا حيسالنى ليه مقلتش كلمة حق وانتخبت اللى تابع للنظام اللى قتل اخواتك وسرقهم وعذبهم وفقرهم عشان كده بقولها بالصوت العالى الحيانى مش حانتخب شفيق ...
عشان كل ده حقول كلمة الحق ورزقى على الله .....
- حقول كلمة الحق لانى ببساطه مش عايز الناس تفضل تشرب الميه اللى كلها بكتريا وفطريات وصرف صحى مش عايز الناس تلم اكلها من الزباله وتبكى بالدموع لما تقدر تجيب انبوبه عشان تطبخ لولادها واحنا بنصدر الغاز لاسرائيل واسبانيا لان المثل بيقول اللى يعوزه البيت يحرم على الجامع..
- حقول كلمة الحق عشان الناس اللى بتتعالج من السرطانات كتروا أوى..وانا عارف ان التلوث وقلة الضمير هو سبب مرضهم..
حقول كلمة الحق عشان القمح فاسد والمبيدات مسرطنه والأكل كلهأمراض والشفيق حيمشى على نظام المبارك..
حقول كلمة الحق عشان الناس اللى عندهم تليف كبدى فيروسى وفشل كلوى أكتر من اللىعندهم برد
حقول كلمة الحق عشان عايز حق الغلابهفى المراكز اللى معندهمش صرف صحى ولسه بيحفروا ترنش
حقول كلمة الحق عشان الست المسنهاللى عندها فوق ال80 سنه ومعندهاش كهربا ولا ميه عشان الست دى متشتريشجركن الميه -الجربانه- ب20 جنيه محدش فيكوا بيتفرج علىبرنامج واحد من الناس وغيره.
حقول كلمة الحق عشان مش عايز أدفع رشوه فى المرور والشهر العقارى والجماركوالضرايب والبلديه
حقول كلمة الحق عشان الدكتور المصرى اللى اتجلد فى السعوديه يتعمل له حساب ويرجع بلده مكرم زى الامريكان الللى اتهربو وكرامتنااللى اتهانت جوه وبره والشباب اللى اتضرب برصاص اسرائيل علىالحدود
حقول كلمة الحق عشان مش خايف من الاخوان وعارف ان كل دى دعايه عشان يرجع النظام الفسدان..
مش هما اللى حطونا امام الاختيار الصعب يالشفيق يالاخوان طيب انا جربت الشفيق اللى هو نظام مبارك ممكن المره دى اجرب الاخوان يمكن يطلعو احسن ولو مفيش فرق مش حخسر حاجه اهو كده كده خسران بس لو طلعوا صادقين زى لما قالوا احنا نزلنا مرشح لرئاسة الجمهوريه لان فيه محاولات لحل مجلس الشعب وطلع معاهم حق يبقى ضيعنا فرصتنا الوحيده ان نعيش فى حياه كريمه وننهض ببلدنا......وعلى راى فؤاد المهندس مش كده ولا ايه..
انا لو انتخبت شفيق يوم الدين هقول للشهيد انت مت عشان الثوره تنجح وانا ضيعت الثوره وانتخبت الشفيق.
__________________
 "اللهم أنصر الاسلام وأعز المسلمين"
التعديل الأخير تم بواسطة koashraf ; 15-06-2012 الساعة 05:54 PM
|