[الدملاوي]

الووو..الووو...!!

يا مصر تليفونك مقفول...
ولو اتفتح بيكون مشغول
سايبانى ليه محتار على طول
باقول كلامى ..وفين الرد ؟
الوو...الووووووو
طب ردى ع الخط التانى
خـط الكلام .. الانسانى
مانيش سياسى وكانى مانى
يا حبيبتى دانا باتكلم جد
الوو...الووووووو
مكالمتى.. ليه مقطوعة..
ليه الحرارة مرفوعة..
ومرارة الناس مفقوعة..
وكلام أونطة وجذب وشد
الوو...الووووووو
يا سنترال بعيار فالت
انا هاتصل تانى وتالت
دانا كلمتى يا ما اتقالت
وهاقولها مهما تزعل حد
الوو...الووووووو
رغم السُكات سامع دوشة..
ومزايدة وصراع ومناوشة
ماترمميش جدران بايشة..
ابنى الجديد ..والحيل يشتد..
الوو...الووووووو
يا ام الكتابة المسطورة
ليه من بُكاكى مفطورة؟!
كام مرة سددتى فاتورة
من امتى وانتى تمدى اليد؟؟
الوو...الووووووو
ماملكش غير كلمة وهِدمة
وعزيمة قايدة و محتدمة
ازاى أكون برة الخدمة
وانا رصيدك ساعة الجد
الوو...الووووووو