[3bd0]

انا بصراحة مش شايف ان عدد العربيات هايتأثر خالص بقرار زي ده، اللي هايتغير هوا نوعية العربيات بس
عدد العربيات بيعتمد بشكل كبير على عدد الناس اللي معاهم رخص، مش على سهولة انك تشتري عربية ابدا

لو هو هو نفس عدد الناس اللي بتسوق كل يوم متغيرش، عمر ما ازمة المرور او ازمة البنزين هاتبقى اسوء، سواءا بقى عربيات رخيصة غالية كبيرة صغيرة مش هاتفرق، هوا هوا العدد
الا بقى لو هاتبص على ان متوسط السعة الليترية هايزيد وبالتالي متوسط استهلاك البلد للبنزين هايزيد، فده موضوع تاني

ولو جينا للنوع التاني من الناس اللي هما بيستخدموا الموصلات وانتو خايفين ان الناس دي كلها تنزل تشتري عربيات اول ما يطلع القرار، فدول 3 انواع:
يا اما مبيعرفش او ما بيحبش يسوق ودول برة المعادلة
يا اما نفسو يجيب عربية ويرتاح من الموصلات، بس ظروفه المادية مش مساعداه، وده بعد القرار هاتبقى حالته هيا هيا، لأن العربيات الاستيراد دي مش هتنزل ب 3 جنيه برضو
النوع الأخير اللي معاه فلوس عربية، فده كده كده هايشتري عربية سواءا بقى عربية حلوة ولا وحشة عشان يرتاح من المواصلات، قليل قوي اللي تلاقيه معاه فلوس عربية وعاوز عربية بس مش عاجبه جوده العربيات وبالتالي ميشتريش حاجة خالص

طبعا في نقطة ان العربيات المستعملة اللي حاليا في السوق المصري هاينزل سعرها بشكل كبير، وبالتالي هاتبقى في متناول عدد ناس اكتر. ودي حلها بسيط والله، من غير قوانين جديدة ولا حاجة، كل اللي احنا محتاجين نعملو ان الفحص بتاع المرور يبقى بذمة وضمير زي بقيت دول العالم.
تخيل لو كل عربية فيها فانوس مش شغال او مرايا مكسورة، ولا بتطلع دخنة من الشكمان، ولا صوتها مزعج، ولا عفشتها واقعة ولا حتى مخبوطة ومش متصلحة، تخيل لو كل دول قالولهم روحو صلحو الحاجات دي وتعالو تاني.
في عربيات كتير ماشية في البلد تحتاج تصليح بتمن عربية جديدة (وبالذات ان سعر المستعمل هايبقى واقع) وبالتالي هتلاقي عربيات كتير اتفككت واتباعت خردة.
ولو افترضنا الناس كلها قررت تصلح، ساعتها العربيات اللي اتصلحت دي هايزيد سعرها تاني في سوق المستعمل، ويا دار ما دخلك شر