[Ayman_Nazeih]

تقرير النهارده فى الحرفيين............
رحت عند واحد بتاع استيراد وسألته على حساس الايدول ولقيته وركبهولى وجربت العربية وبعد حوالى 3أو 4 دقائق والعربية دايرة سلانسية من غير ما اتحرك بيها بطلت تانى قام نصحنى انى اروح احطها على جهاز كشف الاعطال ووصفلى واحد وقالى ده ممتاز يعنى اكيد العيب عدى عليه قبل كده وهينصحك تعمل ايه بالظبط.
المهم رحتله وركب السكانر وقالى مش عايز يدخل على عربيتك وحاول اكتر من مره وبعد كونسولتو جاب جهاز تانى وحاول بس برده نفس النتيجة مرضيش يقرأ العربية.
فقام باعتنى لواحد تانى رحتله وركب السكانر وقالى قرا 3 حساسات فيهم ايرور بس همسحهم ونقرا تانى وبالفعل قرأ تانى بدون اي ايرورز وقالى كده تمام. جربت قدامه سلانسية مبطلتش وقالى روح اعمل بيها لفة وتعالى تانى ....قمت ماشى بيها حوالى 10 دقائق من غير ماتبطل وطبعا انافى غاية الانبساط لغاية مافتحت التكييف راحت مبطلة .
رجعتله تانى وقولتله ان العيب حصل تانى لما فتحت التكييف قالى جرب التكييف كده فعلا فتحته بس العربية مابطلتش ( شكلها خافت منه). ونصحنى انى اعمل بيها مشوار واحكم بعد كده.
وفعلا عملت لفتين كده فى الحرفيين وبعدها اخدت طريق البيت لحد نادى السكة الحديد مدينه نصر من غير ماتبطل وركنت تحت البيت ورحت مشغل التكييف وانا على السلانسية لمده 3 دقائق وراحت مبطله.
طبعاً اتخنقت جداً وقلت يافرحة ماتمت.
بس انا لاحظت حاجة النهارده بس بعد ما فكيت وركبت الايدول ان فيه دخنة بيضا من الشكمان !!!!!!
مش عارف ايه سببها؟؟؟؟؟
ونسيت اقولكم فى تقريرى عند الميكانيكى من يومين انه فك طلمبة البنزين ونضف المصفاه وقاس ضغطها وطلع انه 2.5 ولما سألته ده طبيعى قالى ان لما بتكون جديده بيبقى ضغطها 3.4 وان الفرق مش كبيير قوى.............افيدونى الخطوه الجاية تبقى ايه.........والله بفكر افك الشكمان زى ماقال صديقنا العزيز مشمش.......
وسامحونى على الاطالة والف شكر لكل اللى واجع دماغهم معايا بالموضوع ده.