[alymonir]

السلام عليكم و رحمة الله و بركاته
حلقة أخرى من سلسلة متابعات السيارة مازدا
و أنا أحاول - قدر المستطاع - نقل خبرتي و تجاربي المتواضعة عن السيارة لعل ينتفع بها أحد في يوم من الأيام
و أحب أن أذكر أن هذا الموضوع حصري لمصر موتورز و لا أصرح لأحد بنقله إلى منتدى اخر
ندخل في المهم
طبعا اللي متابعيني من الأول عارفين اني عملت صيانة ال 20000 كم خارج التوكيل عند ورشة خارجية خاصة بقريب لي ( ابن خالتي ) و عملت الصيانة دي عنده برضه
بداية كم السيارة كان حوالي 37000 كم و الكم الاخير كان 35000 كم يعني الفرق حوالي 12000 كم و الملاحظ الحمد لله ان تأخير السيارة عن ال 10000 كم لا يضر بشيء اطلاقا على خلاف ما يتوهمه البعض عن طريق التوكيلات التي ترهب الزبون حتى لا يتخطى المسافة بكيلومتر واحد خوفا على الضمان ( وسلملي على الضمانات في مصر خصوصا غبور )
في الكتالوج صيانة ال 30000 كم تشمل الاتي :
زيت موتور و فلتر
بوجيهات
فلتر بنزين
تربيط عفشة و الذي منه و خلافه
المهم
أنا قررت أأجل البوجيهات و فلتر البنزين شوية
و كنت مأجل فلتر الهواء و التكييف من المرة اللي فاتت قلت أعملهم المرادي
و كنت اخر مرة مغير التيل الأمامي كنت عامل حسابي و اشتريت تيل خلفي المرة دي تحسبا لتغييره
المهم
سلمت العربية كالمعتاد للورشة و قلتلهم على كل اللي عايز أعمله
و الذي تم الاتي :
1- تغيير زيت موتور ( فيسكو ) و فلتر زيت + اضافة زيادة لزوجة للزيت من شركة abro
2- تغيير فلتر هواء
3- تربيط عفشة و فحوصات لسوائل السيارة و الكشف على كل شيء في السيارة تقريبا و كله طلع تمام و الحمد لله

الذي لم يتم :
1- لم يتم التوصل إلى مكان فلتر التكييف ؟!!!!!!
2- التيل الخلفي كان كويس فأجلت تغييره شوية
3- لم يتم الكشف على الفريون
4- لم يتم عمل مقص للعجل ( علشان قرب يتغير )

المصنعيات كلفتني 400 جم بالزيت و بالبقشيش ( 370 + 30 )
التيل كنت شاريه من التوكيل ب 600 جم !!!! ( تييييييييييييييييييت )
فلتر الهواء 90 جم (مش اصلي)
فلتر التكييف 110 جم (برضه مش أصلي)
اضافة زيت موتور 60 جم
اضافة رفع الاوكتان ( مش فاكر سعره ) حطيته مع أول تفويلة بعد الصيانة
المهم الموضوع كله ( الحاجات اللي اتغيرت بس ) كلفني حوالي 700 جم
طبعا لو في التوكيل مكنتش حادفع أقل من 2000 جم ( لأنهم كانوا حايغيروا كل حاجة حسب الجدول + تغيير التيل + اسعار الفلاتر داخل التوكيل مضروبة في 3 )

بعد كدة بيومين تقريبا ضبطت زوايا في بنزينة موبيل سموحة

الملاحظات :

العربية فاقت !!!
السحب اتحسن كتير ( يمكن بسبب فلتر الهواء )
النقلات بقت أسرع
العفشه طبعا بقت انعم
مدفعتش كتير زي التوكيل

أنا مقتنع جدا باللي انا عملته و راضي عن هذه الطريقة و حاسس اني باخدم العربية كويس و بدون تكاليف مرهقة

أرحب باراءكم و اقتراحاتكم