الف شكر على المجهود الهايل يا استاذ يحي و اهنئك على روحك و عطائك النقى الصافى لوجه الله تعالى واللهم اجعل هذا المجهود فى ميزان حسناتك يوم لقائه بإذن الله - اما عن استفسارى هو غريب و متشعب و هيتعبك شوية بس انا عارف انك صبور و روحك سمحة - انا كنت محتار فى شراء عدة انواع من السيارات و علما بأنى مسافر بره مصر و ابحث عن سيارة للشراء فى مصر - فكرت فى وقت ما فى السيارة النيسان الاكس تريل 2012 و شفتها فعلا عند السبع فى مدينة نصر بس ناس كتير خوفونى منها و مش عارف صناعة مصرية و ناس تقول العفشة سيئة و قطع الغيار و التوكيل و الصيانة سيئة و السحب ضعيف - المهم فكرت بعد كده فى الباسات 2008 و الناس برده خوفونى منها و قالوا كلام كتير على الفتيس و الصيانة و قطع الغيار و بعض عيوب المكيف - المهم فكرت فى البيجو بانوراما 5008 لقيتها غالية اوى و محدش جربها لسه و موضوعها مبهم و مش واضح - فكرت فى السيارة اول فئة من بى ام دبليو 2012 و لقيت انها صغيرة و هابطة على الارض و ملقيتش حد يشجعنى - فكرت بعد كده فى مرسيدس 200 عيون نظيفة موديل 2001 او 2002 و الناس قالت لى اشترى زيرو احسن من الفخم القديم و عايز رأيك فى الحكاية دى - و بعدين فكرت في الدايهاتسو جراند تريوس قالوا دى سلحفاة و بطيئة فى السفر و مش دى اللى ترضيك على اساس انى راكب امريكى بره مصر - و بعدين فكرت فى الكيا كارينز هاى لاين 2012 و ده لما لقيت الناس فى مصر كلهم معاهم السيارة دى و مالية القاهرة و لما ركبتها لقيت انها واسعة و عالية و لكن فيه ناس قالوا فيها عيوب فى طلعة السيارة و متديش عزمها اللى بعد المائة و حجمها كبير على الموتور 1600 - من الاخر - انا لغاية دلوقتى مش عارف اخذ قرار - و ياريت يا استاذ يحي تفيدنى فى سيارة تتناسب مع مصر و فى نفس الوقت سيارة شيك تتناسب مع الوضع الاجتماعي و تكون متوفرة فى قطع الغيار - انا طبعا عارف ان مش كل حاجة هلاقيها فى سيارة واحدة ولكن انا كنت عايز الفخامة و البرستيج و الجودة و قلة العيوب بقدر الامكان و توفر قطع الغيار و الصيانة - نسيت اقولك انى فكرت فترة فى الاسكودا اوكتافيا 2012 و برده لسه لم اخذ قرار - المهم انا طولت عليك سامحنى و انا منتظر ردك و الف شكر
