[AbOnOrA]

احنا ملناش فالديمقراطية . احنا شعب فينا 40% تحت خطر الفقر دة غير نسبة الجهل ألي تقارب ال 60% محصلوش علي تعليم جامعي . كل دة لية مدلول واحد اني الديمقراطية مش هتنفع .

علمياً كلامك مش دقيق طبعاً لان مش شرط الشعوب تكون غنية او نسبة التعليم الجامعى فيها عالية علشان تكون ديموقراطية

كمان مش مقبول من السيد عمر سليمان او السيد ابو فاروق او اى حد فى الدنيا انهم يعتبرو نفسهم (اصحاب الديموقراطية) ويمتلكو حق وهبها للشعب او لاء !!!

وبافتراض (جدلاً) ان ده صحيح اسهل نقصر حق التصويت على فئات معينة ( وده ليه واجاهه وسوابق تطبيق ) بس برضو ده مش معناه اننا لا نستحق الديموقراطية ( الان)


عموماً علشان مطولش عليك فى الجزئيه ديه وهى تحتمل عشرات الردود عليها هقولك بس ان الديموقراطية مبداء والمبادئ لا تجزء فعلينا اننا نعتنق المبداء ونطبقه ومع الوقت نرسخ المعتقد ونطور المنهج .. وكل ما نبداء بدرى كل ما كان احسن

لكن الحاصل ان اصحاب القناعات الباليه ديه امثال عمر سلميان عايزنا ( بسوء نية ) كل ما نتقدم خطوة نرجع عشرات الخطوات تانى لان استمرار الشعب على الحالة ديه لا يخدم الا مصالحهم

اما (المؤمنين بالديمووقراطية نظرية وتطبيقاً ) فمن مصلحتهم ان الناس تحط رجلها على الطريق وتبداء الممارسة والتطبيق وعقيدتنا اننا قادرين على الوصول لنموذج ديموقراطى ناجح ورائد فى فترة اقل من الشائع (قديماً) باثر تقنيات الاتصال الحديثة
وثقة فى مدى حاجة وجاهزية الشعب لاسترداد ارداتة

وخلينا نقولها تانى بالزبادى

عارف يا ابو فاروق لما فاروق ابنك يكبر ان شاء الله ويتجوز وهو لسه عريس جديد يطلب من عروستة تعملكو عزومة جامدة ليكو عندة
طبعاً عروسة جديدة غالباً غير مؤهله لعمل عزومة كبيرة واصناف كتيرة لا عندها المعرفة الكافيه ولا الخبرة

رايك يقولها ملكيش فى العزومات ؟؟
ولا يقولها لازم تجربى وتحاولى وتتعلمى من اخطائك واكيد مع الصبر والمثابرة هتعرفى ؟؟

طيب شجعناها وعملت العزومة والاكل طلع وحش والتنظيم بقى هرجله وبوظت الدنيا خالص
نقولها انتى فاشله ومش نافعة وملكيش تعملى عزومات
ولا نقولها اتعلمى من غلطاتك وشدى حيلك الزيارة الجاية

علشان كده بقولك ان مش صح نحكم بعدم اهليه شعب لامتلاك ارادته الصح اننا كلنا نتعلم ازاى نوحد ارداتنا على مصالح واهداف مشتركة

وصدقنى لو بتحب مصر وشايفها كبيرة فى عينك مش هتقدر تتصولها بشكل تانى غير دولة مدنية ديموقراطية حديثة اسوارها مبنية على العلم والعمل واساسها مبادىءها وثقافاتها واديانها المتمثلة فى سلوكيات شعبها مش شكلياته


اسيبك مع اول كوباية زبادى ولى عودة ان شاء الله