[dr_eslam_66]

عموما إنتا ماكنتش هتعطله لوحده إنتا كمان كنت هتتعطل معاه وكان ممكن يحرق دمك هوا ويسيبك ويمشي ويقولك إبقى إديهم رقم العربية (سسيادتك في مصر) مافيش حاجة تضمنلك إنه لازم يقف يستنى غير دراعك.
عموما يعوض عليك خير والحمد لله سليمة.
بعد كدة فعلا ماتكتفيش بالكلاكس إنزل زغرطله على الأسفلت.
لأني حصل معايا نفس الموقف برضو مع إختلاف بعض الملابسات. أولا أنا في الإمارات
كنت راجع متأخر حوالي الساعة 2 أو 2.30 بليل وقبل ما أطلع البيت إفتكرت إني سجايري خلصت والسوبر ماركت الي جنب البيت قفل وفيه واحد فاتح 24 ساعة ونا لسة ماركنتش قولت بالمرة روح إشتري السجاير وحاجة للفطار.
قدام السوبر ماركت هيصة شوية لأنو الوحيد الي فاتح في المنطقة 24 ساعة ركنت جنب الرصيف ورى عربية باجيرو وورايا عربية تانية آه كلنا واقفين مخالف بس دي دقيقتين وكلنا بردو موازي للرصيف.
أطلع يامعلم من السوبر ماركت وأركب العربية وأدور وأرص حاجتي وإذا بالعربية الباجيرو بترجع أزمر مافيش أزمر بصوت اعلى والدنيا ليل أنا قولت بس أقوله إني موجود مافيش دوست كلاكس على الآخر وعلقت وهب طاخ قام خابطني.
هوا عربيته عالية ريح على الإكصدام من فوق, الإكصدام ريح لتحت طرقع كلبس بس الدهان زي ماهوا الفانوس والشبكة زي ماهما.
لا والي غاظني أكتر إني ماحدش نزل يقول حصل خير ولا آسف ولا هنتصل بالشرطة ولا حاجة أنا فضلت قاعد في العربية وهوا سايق التناحة ومانزلش.
قولت لأ أنزل بقى أوريله مقامه.
ألاقيلك جوز ستات ربنا يستر على ولايانا ياعني أستغفر الله العظيم أنا حطيت وشي في الأرض والله العظيم من مناظرهم.
وبترد عليا بمنتهى البرووود شووو ياعني مو بسيطة الحمد لله خلاص لاتصيح بدك تتصل بالشرطة أنا ماعندي مانع.
بيني وبينك أنا عرفت دول ميتهم إيه دول عالم فاضية ورايقة ومابيشتغلوش بالنهار شغلهم بليل بس أنا غلبان هصحى الساعة 7 الصبح أنزل أتمرمط المهم ماردتشي عليها روحت رفعت الإكصدام طلع كلبس وفك بس مافرقعش وبيته في مكانه وكله تمام وإتاكدت إني ماعنديش بدرهم واحد تصليح وهما مستنيين قراري بقى هتصل بالشرطة ولا أمشي قومت راكب العربية وماشي وسيبتهم من غير ما أعبر فيهم ولا حتى أقولها تمشي.