[كيمو كار]

قبل الانتخابات بايام كنت واثق ان احمد شفيق ملوش شعبية والاعاده بين مرسى وعبد المنعم او مرسى وصباحى.. ولكن بعد اللى شفتوا النهارده من الصبح فى الشغل الى أن رحت لجنه الانتخابات تاكدت ان الاعاده بين مرسى وشفيق..

اول الحكاية كنا متقسمين فى الشغل ما بين ابو الفتوح وصباحى وقليل منا كان مرسى وموسى .. ولكن يوجد اغلبية كتير مش بيكلموا فى الانتخابات ولا فى السياسه ولا ليهم دعوه بحاجه اول مره اعرف النهارده انهم كلهم اينتخبوا شفيق وكمان لاحظت ان كل السعاه اينتخبوا شفيق ومش كده بس احنا عندنا السعاه من القرى عرفت ان كل ساعى من قرية معظم اهل قريته اتنتخب شفيق ... استاذنت من الشغل ورحت انتخبت ..

اللجنه بتعاعتى فى منطقة شعبية اسمها وكالة البلح كلها بياعين قطع غيار وملابس من اول ما ذهبت المنطقة لقيت اصحاب المحلات هناك معلقين صورة شفيق فلان الجزار يرشح شفيق .فلان صاحب ورشة مرشح شفيق . سالت اصحاب الورش اللى هناك على اسم المدرسة الى انتخب فيها رد عليا وقالى امشى علطول وحتلاقي المدرسة على اليمن .. انشاء الله احمد شفيق .. قلت له لا قالى طب لا بقه الزعل ده ...

فى اللجنه وانا واقف فى الصف لقيت واحد منتخب خلص وخارج من اللجنه رافع ايده وبيقول شفيق .. رد المشرف عليه وقالوا غلط كده يا استاذ محدش يقول على اسم مرشح هنا ..

بعد ما انتخبت هناك راجل مشهور بتاع كبده ومخ قلت اجيب الغذاء منه .. وانا واقف هناك لقيت الصناعية اللى هناك تصوروا بيقولوا لبعض ايه .. انت انتخبت شفيق ولا لسه .. واحد تانى بيشترى بده بيقول يلا بسرعه علشان الحق انتخب شفيق .. بصراحة منطقة كلها فلول بشكل غريب جدآ مع انها منطقة شعبية
.. ومرسى علشان الاخوان عددهم كبير ضمن اصوات .. يعنى لو الاعاده بين مرسى وشفيق لازم كلنا ننزل ننتخب مرسى ......