استكمال لمسلسل السخونه
رحت النهارده لمحمد السبكى اكبر موزع للريداتيرات عشان يسيخ الريداتير وينظفه بس للاسف بعد ما اتفك طلع ماينفعش بتعريفه
المهم سالته عن الجديد قالى فيه ب 375 وفى ب 425 والفرق ان ابو 425 ده خليجى يعنى اكبر ومخصص لل 2000 عشان التكييف
المهم اشتريته ورحت لاحمد محرم بتاع قطع غيار الفيات واشتريت مروحة الشاهين ( القطش ) بالقميص بتاعها
المروحه الاصليه اشتريتها ب 235 و 45 القميص واشتريت مروحة 8 ريشه عشان اركبها على اكس الكاتينه عشان مستهلكش مروحة الشاهين
وخدت بعضى ورحت للسبكى وركب القميص بالمروحة ترموستات 82 - 68 والحمد لله بقت فل ومحتاجتش اركب المروحة ال 8 ريشه
وان شاء الله يوم الاتنين هاروحله تانى عشان يغير المياه ب مياه خضراء هو محطهاش من الاول عشان نجرب الريداتير بالمياه العادية عشان لو فيه حاجه لاقدر الله ابقى ماخسرتش
ويوم الاتنين برضه هغير فلتر الزيت وزيت المحرك عشان الزيت القديم ينزل بالرايش بتاع وش السليندر
وكده ابقى عالجت موضوع السخونه نهائيا باذن الله
اجمالى المشتريات
235ج مروحة قطش
45ج قميص المروحة
14ج مروحة 8 ريشه يوغسلافى والتركى ب9ج
425ج ريداتير خليجى
12ج غطاء ريداتير
10ج مصنعية الكهربائى اللى وصل المروحة
10ج اكراميه للصنايعى بتاع الريداتير
20ج مصنعية فك وتركيب الريداتير
وحسب القديم ب50ج
ارجو اكون قدرت افيد اى حد مقدم على العمليه دى والله ولى التوفيق
اخوكم
مصطفى العيسوى