[ابو هيما]

المشاركة الأصلية كتبت بواسطة ahmed_elmagree الشقة بسم الله ماشاء الله رهيبة جدا ومكانها ممتاز وانا لو كان ينفع كنت خليت الحج يبيع شقتنا هنا وناخد ديه عشان بجد مكانها تحفة لكن المشكلة ان مساحة الشقة اصغر فمش هتنفعنا للاسف. سؤال لولبى شوية:هى الشقة فى جمبيها مراكز صيانة سيارات وكده ولا بعيد

أهلاً وسهلاً بيك أستاذ أحمد وانا يشرفنى كتير معرفتك وسعيد بتعليقك وبتعليقات كل اللى بيشاهدوا الأعلأن ويا سيدى كفاية ذوقك وأعتبر ثمن الشقة وصل .
بالنسبة لمراكزالخدمة والصيانة المعتمدة فهى كتير جداً مثل تويوتا ورينو وهيونداى ومنصور شيفروليه وغيره وتقع معظمها فى شرم الشيخ ( 150 كيلو متر من نويبع ) وهى معظمها مش بتبقى زحمة زى التوكيلأت فى مصر يعنى ممكن تخلص فى ساعة أو ساعتين بالكتير أوى ده غير برده الورش الكتير الموجودة فى منطقة الحرفيين بشرم الشيخ وبصراحة اليوم اللى بيبقى فيه صيانة فى شرم ده بنعتبره أنا والأولأد يوم فسحة لأن محمية رأس محمد ذات الشعاب المرجانية الجميلة تقع على بعد 16 كيلو من شرم فبنستغل الفرصة دى وبنروح هناك نعوم... ده بقى غيرمنطقة خليج نعمة ومنطقة السوق القديم والحفلأت اللى بتبقى فيها بالليل لتنشيط السياحة ومنطقة الميركاتو ذات المطاعم والكافيهات الجميلة , كل ده بيخللى الواحد مستنى اليوم ده يجي عشان يغير جو .
أجمل حاجة بقى فى الشقة ودى عن نفسى بعتبرها ميزة كبيرة أوى أكتر من الموقع ,, وهى أن ضوء الشمس بيدخل ليها من جميع النواحى وهى على فكرة مش حر خالص والبلكونة طول النهار فى الناحية اللى فيها الظل يعنى تقدر تقعد وتتفرج على البحر براحتك خالص ده غير أن العمارات اللى حواليك مش كشفاك خالص يعنى لو فتحت الشبابيك كلها أستحالة حد يطل عليك و يكشف بيتك .
وكمان أنا بعتبر النظافة والهواء النقى ده غير الحمد لله الأمن والأمان فى المدينة بفضل الله بيبقوا بردوا من أكبر المميزات , والحاجات دى أنا بحس بيها أوى وبمدى أهميتها وبالأخص لما بنزل القاهرة ساعتها بحس بالفرق الكبير والنعمة اللى أحنا فيها والحمد لله .
أرجو أن تتقبل تحياتى وأهلاً وسهلاً بحضرتك فى أى وقت تشرفنى وتنورنى وأزيد شرف بمعرفة حضرتك