[sayed2077]

المشاركة الأصلية كتبت بواسطة farouk89 يا جماعة انا لسه جي من عند الميكانيكي كنت بظبط الفرامل وركبت طنابير خلفي جداد بس لحظت حاجه فالعربيه ان اللمبه بتاعة الحرار لما بتنور بتفضل شغاله مبقتش تنور وتطفي زي الاول فخايف يكون درجة حرارة العربية بيعلي جامد حد يعرف المفروض اعمل ايه الوقتي

بص يا استاذ فاروق لمبة الحرارة اللى فى العداد ديه بتاخد معلوماتها منين يعنى ايه اللى بيقولها نورى علشان درجة الحرارة عالية اللى بيقولها نورى ده حاجه اسمها صباع الحرارة وحضرتك بتلاقيه راكب فوق منطقة البوجيهات او تحتها فى الماتور المهم انه فى المنطقة ديه المهم حضرتك حضرتك اللى هتعمله كالاتى

حضرتك اكيد راكن العربيه دلوقت ومعنى ان حضرتك راكنها دلوقت ان العربيه بكره الصبح هتبقى بارده تماما اوك كده حضرتك هتيجى والعربيه بارده تماما كده تفتح كونتكت وليس انك تدور الماتور يعنى كل اللى هتعمله تفتح كونتكت بعد كدا تشوف اللمبة نورت ولا لا لو نورت يبقى احنا كده عرفنا ان المشكله دلوقت مش مشكلة سخونية كده عرفنا ان المشكله فى دايرة اللمبة بتاعت الحرارة فاول حاجه حضرتك هتعملها لو بعد ما فتحت كونتكت ولقيت اللمبة منوره هتفتح الكبوت وبعد ما تفتح الكبوت هتشوف فين صباع الحرارة اللى بقول لحضرتك عليه ده هتلاقى المفروض راكب فيه سلكه واحده بس ديه هى اللى بتبقى راكبه فيه شوف كدا السلكه ديه راكبه ولا مش راكبه وهل لو راكبه مقطوعه ولا السيلك متوصل تمام وتحاول تهزها يمين شمال لو السلكه بعد ما ركبتها صح او هزتها تروح وتفتح كونتتكت تانى وتشوف لمبة الحرارة فصلت ولا لا لو فصلت يبقى كده عرفنا ان المشكله مشكلة سلكه وهزيناها وخلاص لو مفصلتش يبقى احنا نتجه ان صباع الحرارة اللى راكب عندك خلاص كده باظ فهتجيب صباع حرارة بتاع 128 لمبة وليس مؤشر لان فيه نوعين فى السوق صباع حرارة للمؤشر اللى بيقولك درجة الحرارة بالظبط كام والنوع التانى زى اللى راكب عند حضرتك اللى هو لمبة المهم صباع الحرارة اللمبة ده ب 20 جنية بس على فكره حضرتك حاول تشترية من تاجر امين لان نسبة 90% من صوابع الحرارة اللى فى السوق مضروب المهم دلوقت جبت الصباع الجديد تشيل القديم بمفتاح 19 على ما اظن المهم شيل الصباع القديم وركب الجديد ووصل السلكه اللى بتبقى راكبه فيه وافتح كونتكت وشوف ايه الاخبار وان شاء الله يشتغل تمام

ولكن لو انت جيت تفتح كونتكت الصبح والعربيه بارده ولقيت اللمبة طافيه يبقى حضرتك تشغل العربيه عادى جداااا وتستعملها وتشوف اللمبة لو نورت هتطفى ولا لا لو بقت تطفى وتشتغل زى الاول يبقى خير وبركه مبقتش تتطفى ومره واحده نورت يبقى حضرتك تركن على جنب وتبقى محضر فوطه فى ايدك وتنزل تفتح غطا الردايتير بالفوطه ولازم تفتحه بالفوطه علشان لو المايه بتغلى متحرقش ايدك وتشوف وانت بتفتح غطاء الردايتير بالفوطه المايه عادية ومش بتفور من الغليان ولا اول ما تفتح الردايتير هتلاقى فوران من كتر غليان المايه لو لقيت المايه بتغلى يبقى كده عرفنا ان المشكله مشكلة سخونيه لو مش بتغلى يبقى كده حضرتك تروح عند اقرب كهربائى يراجع لك على التوصيلات لان ممكن يكون فيه ماس وهو اللى منور اللمبة
والله اعلى واعلم