هو الواحد مش هيعرف يسوق في البلد دي ولا إيه
بعد ما قضيت 3 اسابيع باتعلم على تاكسي واحد صاحبي، ربنا كرمني وجبت عربية، ومن يوم ماجبتها والسواقة بالنسبالي بقت هم تقيل على قلبي.
محدش بيصبر على حد. الكلاكس من ورا شغال طول الطريق. امسك الحارة اليمين، الاقيه لازق فيا وبيدي كلاكس. أسحب شوية ألاقي ميكروباص حدف يمين مرة واحدة عشان يحمل راكب. أتبرجل مبقاش عارف أدي اشارة وانقل الحارة الشمال، ولا أفرمل. لو فرملت بلاقي اللي جاي من ورايا بيزعق، ولو اديت اشارة ونقلت للحارة الشمال الاقي كلاكس من على بعد 200 متر، وميبطلش غير بعد مايعديني.
طب امشي على مهلي وأدي انتظار. مش بيفرق مع حد. اعمل ايه؟ هو لازم اسحب بالعربية واقعد أخبط واحك في عربيات الناس؟ ولا الأحسن أمشي على مهلي واحافظ على عربيتي وعربيات الناس لحد ماتمكن من السواقة.
فكرت أعلق ورقة عالعربية أقول فيها إني مبتديء، بس مش هاسلم من التريقة.
أنا بطبعي مش متهور، وحابب الالتزام في السواقة جدا. وعارف يعني ايه التزم بحارتي، ومستحيل انقل من حارة للتانية أو ادخل اي شارع جانبي من غير مأدي اشارة قبلها بوقت كافي وابص في مرايتي كويس.
بس المثالية دي مش بتجيب نتيجة. بقيت حاسس اني سواء اديت اشارة او مديتش مش هتفرق. الموضوع عافية ودراع.
ابقى داخل في شارع ضيق، الاقي اللي جاي في وشي بيشد أوي عشان يمشي أكبر مسافة، ويخليني ارجع لورا بدل مايرجع هو. ويبقى داخل الشارع وشايفني جاي ومع ذلك يسحب بالعربية، ويحسسني اني ماشي عكسي، رغم ان الشارع مفيهوش اتجاهات وفي وسط منطقة سكنية.
ويا سلام بقى لو العربية بطلت مني. بتبقى مناسبة إن كله يعمل حفلة، تلاقي الكلاكسات شغالة من كل الاتجاهات. بدل مادور العربية واطلع بيها في 3 ثواني، ممكن آخد 10-20 ثانية بسبب اللخبطة والتوتر من كلاكسات الناس.
أعصابي تعبت وبقيت اخاف من السواقة، رغم اني استنيت اليوم اللي اجيب فيه العربية ده من زمان، عشان ارتاح من المواصلات واريح الجماعة. ورغم اني بحب عربيتي اوي بس بقيت باشيل هم نزولي بيها في الشارع.
النهاردة خبطت في كورولا من ورا خبطة خفيفة ، شاورت لصاحب العربية واعتذرتله، وهو مشكور اتقبل اعتذاري والموضوع عدى على خير، قمت واخد العربية في اول مكان فاضي قابلني وركنتها وروحت البيت مشي. ومع ان الموضوع عدى على خير، بس كان عندي احساس بالذنب، وبقول لنفسي، هو انا لما ربنا كرمني وركبت عربية هاعمل في الناس اللي كنت من يومين باقول للناس متعملهوش.
احساسي بالخوف على العربية والخوف على عربيات الناس، وإحساسي ان السواقة مش متعة زي ماكنت فاكر في الاول، بالعكس طلعت شد اعصاب وتوتر واستعجال وزعيق. كل ده جابلي احباط.
هو اللي انا فيه ده عادي لأي حد مبتديء، ولا انا واخد الأمور على أعصابي؟
طب تنصحوني بإيه عشان ابقى باسوق كويس ومستمتع بالسواقة ومبقاش حاسس بالخنقة دي في كل مرة اركب العربية؟
كل محترف سواقة دلوقتي، لما كان بيتعلم كان كده برضو؟ طيب عدى المرحلة دي ازاي؟
حد يساعدني يا عالم.
|