[حسين122]

حد خد باله
محدش
طيب
حد خد باله ان ابو أسماعيل خرج من سباق الرئاسة بالرغم من ان معاه حكم محكمه
طيب حد خد باله ان احمد شفيق رجع لسباق الرئاسه بالرغم من مخالفة ذلك للقانون
حد خد باله الرهان دلوقتي على لجنة المعصومين ؟
حد عاوز يقرأ القاتحة على روح البلد ؟
طيب حد عارف ممكن ننتخب مين دلوقتي ؟
طيب حد عارف إذا كان صوتنا هيفرق أصلآ ؟
طيب حد عارف الموضوع كده محسوم لصالح مين ؟
حد خد باله ان الباشا في المركز الطبي لكن ريموت البلد لسه معاه ؟
حد فاكر لما كنا بنتريق على مجلس الشعب و بنقول سيد قراره
حد خد باله ان اللجنة العليا دلوقتي سيد قراره برضه
حد يبلغ اهالي الشهداء
ما نجيلكوش في حاجه وحشه
ما نجيلكوش في ثورة و لا طهارة و لاحول ولا قوة إلا بالله
حد يقولهم معلش
اصل احنا شاطرين في ( معلش )
حد يقول لأهليهم مكنش في لازمه
البلد اصلآ ماتت و شبعت موت
طيب حد يبلغ البوليس
يبلغهم انه في ناس ولاد .... سرقوا الحلم
سرقوا الامل
بس البوليس هيقولك
القانون لا يحمي المغفلين
هوه يعني كان مين عينهم يحكمونا
هوه كان مين قالكم تسكتوا
مين اللهبل الي قال الجيش و الشعب أيد واحده
مصر فيها جيش
جيش بيحمي البلد
جيش بيحمي الثورة الله يرحمها و يحسن اليها
طيب لو كان بيحميها ماتت ليه
طيب محدش واخد باله ان المليونيات معدتش تفرق معاهم
كلها كام ساعه و يروحوا
دي بس حلاوة الروح
خليكم صادقين مع نفسكم
البقاء لله الثورة ماتت
طيب محدش عارف المخرج منين
انا مش منكم
انا منزلتش التحرير ايام الثورة
انا كنت خايف م التغيير
تقريبآ كان عندي حق
ادينا رجعنا زي ما كنا
ماقدرناش نتحد ورا راجل واحد
نكسر بيه كل الحدود ويبقى رئيس مصر دلوقتي
ما قدرناش نتفق
السلفيين بيلوشوا
الاخوان اتفقوا مع العسكر ع الشعب
فهموا غلط انه هيه دي السياسه
و أحنا فهمنا غلط و أديناهم صوتنا و خليناهم اعضاء لمجلسي الشعب و الشورى
سلام يا جدع
البقاء لله
اعتقد انه انا كان عندي حق لما قعدت ف البيت
و الله لو كنت بس اتخدشت ف المظاهرات مجرد خدش
و عشت لليوم الي الاقي فيه رئيس وزراء مبارك بيحكم البلد كنت اتشليت
بكره مبارك و وزراؤه يخرجولنا بالسلامه
و سلملي ع الثوار