[sayed2077]

المشاركة الأصلية كتبت بواسطة kammash0o السلام عليكم ورحمه الله وبركاته أخي العزيز بجد أنا شايف إن في إجتهاد كبير منك عشان تساعد كل أصدقاء المنتدي وده ساعدني أني أهتم بالدخول وأشارك معاكم ويارب تقبلوا أني أكون صدبق جديد لمنتداكم الجميل الرائع . أولا أنا عايز أسأل سؤال ويارب أني ألاقي الرد إلي يساعدني عشان أنا خلاص بأيت بليه للصناعيه من كتر زيارتي ليهم , والحمد لله كل العيله وأصحابي أبتدوا يقولو عليا يا مشحم من كتر البهدله إلي بشوفها من الصناعيه , أنا عندي مشكله غريبه في عربيتي 128 موديل 81 عربيه بحاله الزيرو بجد لاني مهتم بيها جدا بالمسمار طبعا ظهرتلي مشاكل كتير جدا وأنا الحمد لله شخصيا مش الصنيعي إلي حلتها بنفسي وأن شاء الله هعرض المشاكل ديه علي أصدقائي هنا لانها بجد من المسميات إلي بيتقال عليها عيوب خلقيه , أنا عفشة عربيتي الحمد لله من الإيطالي والألماني في قطع الغيار الأصلي إلي أنا جايبهم الحمد لله من أصدقاء أصحاب أكبر محلات قطع غيار في بلدي الزقازيق ودول أكيد مش هيغشوني لانهم ناس بتخاف ربنا الحمد لله وبيني وبنهم عشرة والحمد لله , أبتدت المشكله عندي في هزه جامده في العربيه بعد سرعة 120 والمشكله ديه بتظهر خفيف في السرعه وبتزيد لما بدوس دبرياج عشان أدي العربيه الغيار الخامس , طبعا رحت لظبط الزوايا والأتزان ظبط زوايا ورصرص الكاوتش بره وكمان بعد مركبهم علي العربيه بالموتوسيكل علي الرغم أني مركب طقم جنط ماليزي زيرو بالكاوتش بتاعه من صديق برده , المهم الراجل قالي روح جرب وشوف الدنيا فيها أيه , طبعا جربت ولاقيت حدفه شمال وبرده هزه في العربيه نفسها ومش في الطاره فرجعت ليه وقلتله علي إلي في العربيه فرد عليا وقالي أن الكبالن عندي بايظه وده السبب في الحدفه والهزه , طبعا أنا مش مقتنع بس قلت أمشي في الموضوع لنهايته , طبعا رحت غيرت الكبالن وكمان غيرت الطنابير والتيل عشان لما أجرب أنهي العيب من أساسه بس المشكله أن ظهرت عندي نفس العيب حدفه شمال مع هزه لما بضغط دبرياج وخصوصا في السرع 120 وديه طبعا هزه مش في الطاره ولكن في العربيه نفسها ......... السؤال النهائي هل ممكن المشكله تكون في الديسك والإسطوانه ولا العفشه ؟. طبعا أنا خايف أروح للعفشجي أو بتاع الزوايا لحسن يخترع ليا أي أختراع تاني لاني كده أنا الحمد لله كل العفشة زيرو بالكامل ومش عارف أعمل أيه , ياريت ألاقي الرد الناسب لمشكلتي لحسن أنا خلاص الناس هتروح تقول لأبويا " أبنك مجنون يا حج " ههههههههههههه وأنا أسف جدا أني طولت عليكم معلش بس إلي شفته بجد كتير عليا

اولا ربنا يخليك يا باشا على مجاملتك وان شاء الله هنبقى اصدقاء

ثانيا
مشكلتك اللى فاهمه ان العربيه بتتهز بعد سرعة 120
وبعد ما ظبط عفشه بقت بتحدف شمال مظبوط

فا احنا دلوقت اللى هنعمله اننا هنفحص اكثر من شىء ممكن يكون هو الى صادر منه العيب ده

1:ال128 عموما لو فيها مسمار مش مظبوط عمر ما هتبقى مظبوطه فى الجرى حتى لو ظبط وررصصت

2:لازم تروح لعفشجى الاول يكون معرفه او حد من معارفك يكون عارفه ومتعامل معاه يكشفلك على العفشه حته حته ومسمار مسمار ومتقلش ان كل العفشه عند سليمه اكيد فيه حاجه كده ولا كده عمرها الافتراضى انتهى وهتشوف لو لقيت عيب فعلا يبقى خلاص فورجت واطلع جرب العربيه طيب لو العيب متحلش اولو لقينا حاجه بايظة وبعد ما روحنا ظبطنا العيب اللى كان موجود وظبطنا زوايا برضوا العيب متحلش هنخش على الخطوة رقم 3 وكده يبقى احنا اتأكدنا من العفشه ان كله سليم

3:هتروح لسمكرى امين ويكون ذو خبرة ولازم تكون عارفه او حد من معارفك يدلك عليه هتروح للسمكرى ده يكشفلك على الحوض بتاع العربيه ويشوف الدنيا فيها ايه ممكن يلاقى شروخ او الشاسيه قافل حته صغيرة او فاتح حته صغيرة او فيه حاجه مش مظبوطه فلو فيه حاجه مش مظبوطه خليه يعملهالك ويرجعها لمقاستها المظبوطه تانى وتطلع تجرب العربيه لو العيب اتعمل يبقى خير وبركه متعملتش يبقى ندخل على الخطوة رقم 4 وطبعا كده يبقى عفشه وسمكرة تمام

4: هتروح لميكانيكى يكشفلك على الشدادات كلها و القواعد كلها والقناطير كلها القناطير مفردها قنطرة ويكشفلك بقى وديه مهمه جدا على عارف الحديده اللى ماسكه فى الكوبلن والفتيس اللى اسمها عمود الكردان العمود ده لو فيه نسبة انحناء ولو بسيطه اوووى ممكن تسبب الرعشه اللى انت بتقول عليها ديه وتخليه يكشفلك على بلى العجل وان كله تمام تمام وتشوف بقى لو كان فيه عيب واتعمل والمشكله اتحلت يبقى خير وبركه ولو ماكنش فيه عيب او حلينا المشكله اللى كانت موجوده وبرده العيب موجود يبقى ندخل على الخطوة رقم 5

5:لو احنا عملنا كل اللى فات ومفيش حاجه اتحلت يبقى فيه حاجه غلط اساسا وديه مش هنعرفها غير لما نرفع العربيه ونشوف هل العربيه مغيرة نص ولا ربع او ملحومه فى اى مكان لان فعلا مش هيبقى فاضل غير كده خلاص
ولو متطلعش فيه حاجه يبقى نخش على الخطوة رقم 6

6:حضرتك تتصل بيا وتقولى عملت ايه فى كل اللى فات ده خطوه خطوة واهم حاجه تروح لكل واحد يبقى متخصص فى شغله يعنى متروحش لميكانيكى وتقوله شفلنا فيه ايه فى العفشه فعلا مبيبقاش عندهم الاحساس بالمشكال زى بعض بمعنى عمرى ما الميكنيكى يفهم فى شغل العفشه او السمكرة حتى لو كان شغال فيهم والعكس صحيح

وياريت حضرتك تعمل كل خطوة وتتصل بيا تقولى عملت ايه ورقمى 01007490168

و حضرتك ممكن يكون فاضل اخر احتمال وهو ان كل حاجه سليمة 100% بس ان بعد سرعة 120 العربيه بتخف عن الارض جامد فبيبقى الثبات مش كويس وعموما نصيحتى لييك كفايه عليك لغاية سرعة 100 وكده حلو ااوى لان العربيه تحت سرعة ال 100 بتبقى تحت السيطرة غير كده بتبقى انت وظروفك وعلى فكرة بلاش تصرف جامد اووى فى العربيه ديه لانك لو لاقيت عيب وحليته مش هيفضل على طول محلول لا هيبوظ تانى وتصرف تانى فبلاش تصرف على العربيه ديه خصوصا لو فى حكاية ثبات وانا كل الى قولته ده اكثر الاشياء اللى اتوقعها والله اعلى واعلم