رد: استشاره عاجله...35000 يجيبو ايه
طيب بما انها استشاره عاجله بصى ياستى
هو انهارده كان الجمعه وكنت هاقولك انزل انهارده بس انهارده خلص
مبدائيا 35000 مش قليلين بالعكس حلوين جداا
هفتحك مجال الاختيار ف عربيات اكتر من الى ف دماغك
1 - هيونداى اكسنت مو 2000-99
2- سيات ابيزا مو 2000- 99
3- هيونداى فيرنا مو 2003
4- تويوتا مو 98 بس هاتبقى حالتها وحشه شويه وممكن هايتصرف بتاع 2000 تانى عليها بس مش على طول يعنى بعد فتره
5- الرينو بجميع فئاته حلو وخصوصا كليو بس الى هاتجبيها بالسعر ده هاتبقى راشه بره نضافه او رشه خبطات خفيفه بس الفكره انها فى بيعها مره تانيه مش هاتجيب حاجه وده عيبها
6- دايو جوليت
7 - دايو لانوس مو 99
8- هيونداى اكسل مو 96 او 97
9 - بروتون ساجا او واجا مو2000 او اكتر كمان وديه عربيات ماليزى وبما انك سيده فاكيد مش هاتجرى خصوصا ان ف طفل صغير البروتون عيبها الوحيد انها خفيفه يعنى تمشى بيها اخرك 120 و120 الاخر فعلا مش لانك لو زودتى ربنا يستر بس هى حلوه
نظرا للمشوار الكبير الى انتى هاتخبطيه كل يوم ده بلاش الكيا برايد خالص ولا السوزوكى لا ماروتى ولا ماروكو ولا الكلام الغريب ده العربيات ديه الواحد بيجيبها زيرو ب36000 وبتسخن فبلاش
ممكن وياربت تقع ف ايدك حاجه منها الكيا بيكانتو مو 2005 او 04 بس دورى اكتر
ده موضوع العربيه
ولو هاتنزلى يبقى انزلى سوق الجعمه الجايه وخدى ميكانيكى معاكى او اى حد فاهم ف العربيات
موضوع الرخصه بقى هو السلام ده مرور زباله وكله عارف كده بس 800 جنيه ده نصب مش رشوه
او رشوه ونصب مع بعض
لو مكتب هايعلم وهايطلع رخصه اخره اوى تدفعيله 500 جنيه ده لو مكنش اقل انا كنت شغال مدرب سواقه وعارف الاسعار ديه والاحسن من موضوع المكاتب ده انك تروحى لمدرسه القياده الى تبع المرور ديه بتعلم وبتطلع الرخصه ب350 جنيه او 400
والاحسن والاحسن انك تتعلمى لوحدك وتخشى بقلب ميت اصلك حتى لو صقتى مش هاينفوكى بره البلد هو اخرك هايقولك تعالى بعد شهر خدى الكلمه واخرجى سوقى عادى واتعلميلك شويه وارجعى بعد شهر ده مش حوار وكل حوارات الرخص ده على بعضها 60 جنيه تمن الورق وانا مبحبش حد يدفع فيها فلوس عشان لما تخديها تقولى ختها بمجهودى مش بالكوسه
بس ياستى وانا تحت امرك ف اى استفسار اخر
والله الموفق
|