رد: أشعر بالفساد فى كل مكان.. ومش حاسس بمقاومة من جانب الحكومة.. كل يوم بحس بالغربة أكثر.. وإن البلد مش بلدى
شكرا لكل من تفضل و قرأ و من تفضل و شارك
فى البداية أحب أقول إن الموضوع مش بعيد عن إهتمامات أعضاء المنتدى و لا حاجه كلنا بنحب مصر و كلنا عايزينها تبقى أحسن
ثانيا أنا عملت الموضوع ده بدون تعليق منى علشان الموضوع أو الخبر فى حد ذاته أقوى من أى تعليق أو رأى شخصى ثانيا لترك الحرية للأعضاء للمشاركة سواء بالاتفاق أو الاختلاف دون فرض إتجاه محدد من ناحيتى .
ثالثا بغض النظر عن مضمون كلام الطالب و رأيى أنا فيه الموقف و الحدث فى حد ذاته مهم للأسباب التالية :
1- إنه من طالب و شاب عمرة فى حدود العشرين سنه (كل من هب و دب ينتقد فى الأجيال الجديدة و يتهمها بالسلبية)
2- إنه طرفيه طالب جامعة و رئيس وزراء (مفيش تكافؤ خالص)
3- إنه بيأكد على شجاعة هائلة من شخص عادى
4 - إنه نشن و نشانه رشق - يعنى قال كلمتين من غير لف و دوران و من غير تزويق و محلسة لكنهم كانوا كلميتين بيعبروا عن شعور ملايين
5 - إنه دش بارد و كورسى فى الكلوب لكدابين الزفة و المطبلاتيه
6- إن الطرف الضعيف جاب الطرف القوى لمس أكتاف و هو سايب إيده (راجع رد رئيس الوزراء هتلاقية مزيج من جبسة الدم و التهييس و لا يمت لموضوع السؤال بصلة)
رابعا فيما يخص الموضوع أنا مش من أصحاب النظرة السوداوية و مش من المعارضين لمجرد المعارضة و مش من نوعية معاهم معاهم عليهم عليهم .. أنا شايف إن فيه نماذج كتير كويسة سواء فى الحكومة أو فى أى مكان و فيه ناس كتير بتشتغل بجد علشان ترضى ربنا - و فيه كمان نماذج عايزة قطع رقابها ، يعنى فيه أبيض و أسود لكن إللى باين قوى هو الأسود المهبب.
المشكلة بقى إن ساعات كتير النماذج السيئة دى ما بتلقيش إللى يقولها تلت التلاتة كام بل على العكس تلاقيها فايتة و طالعة و واصلة و الكويس تلاقية متدراى و غلبان و مهضوم حقة
الخلاصة علشان متفلسفش كتير "العدل أساس الملك"
خامسا مش هنتقدم و لا هنتطور إلا لما يبقى عندنا مليون بظاظو و كل مسؤل يبقى خايف ليطلعلو بظاظو يحاسبة ، السلطة المطلقة مفسدة مطلقة و نقد الحكومة واجب عند أى خطأ و الإشادة بيها واجب عند كل إنجاز و الى بيحب الحكومة ما يسكتش على أخطاءها، مش هيغرقنا غير "تمام معاليك و هايل سيادتك" .
سادسا نقد الحكومة مش يعنى دعوة لقلب نظام الحكم ،و نقد الحكومة مش شتيمة فى مصر ،و مصر مش هى الحكومة بس ، و النفد مش لللحكومة بس لكن لينا إحنا نفسنا ، لسلوكنا و مواقفنا كمان ، و نقد الذات مش عيب و لا فضيحة.
أخيرا يشرفنى طبعا يا أستاذ هانى إننا نكون أصدقاء
|