بعد العشاء قال لنا فيتور ان التحرك الى مكان الدرس ح يكون
الساعه 6 صباحآ لآن الدرس بيبدأ الساعه 7 صباحآ والطريق
زحمه و طويل ! و قد كان ! يعنى لازم تصحى 5 مثلا تصلى
و تذهب الى الافطار ! و بصراحه الافطار هناك جامد جدآ بس
أنا قعدت الشهر كله افطارى لا يزيد عن الآومليت فقط مع
كوب عصير فريش ثم شوب قهوه بلاك بدون سكر ! توكلنا
على الله وأول مره نشوف الطريق فى الصباح الباكر المنعش
سيارات ايه بقى ! كل الآنواع والآشكال الحديثه و معظمها
أوروبى لآن الناس أصولها أوروبيه ! لم أر سياره واحده
مجروحه أو مخبوطه أو بتطلع دخنه ! فى أول الطريق كان
عساكر المرور سيدات أفريقيات و فيتور كان كتصاحب عليهم
كلهم ويشاور لهم اشارات صداقه ! ( بعد كده كنت بأقوم أنا )
( بالمهمه دى ) ! الطريق طبعآ على الشمال و مزدحم جدآ
والسرعه لا تزيد عن 60 و أحيانآ يحدث توقف ! الطريق عباره
عن 3 حارات لكل ناحيه و الحاره الشمال فاضيه و مخصصه
للاسعاف و البوليس و لا يمكن لآحد يمشى فيها لآنه لو دخل
فيها موش ح يقدر يرجع للصف تانى ! كمان استحاله حد يعدى
سياره حتى لو الحاله تسمح ! يعنى لو شمالك أو يمينك
فاضى لا يمكن تنحرف و تعدى ! بس ساعات الشباب
بيعملوها بالليل ! بين الحارات بيكون متشع حوالى 1.5 متر
دى بيجرى فيها بتوع الموتوسيكلات بسرعه شديده و بكل
ثقه لآنه متأكد ان ماحدش ح ييجى يمين أو شمال ! أجدع
حاجه شفتها بقى و نفسى تطبق فى مصر ! ان كل كام كيلو
كده تلاقى لوحة اعلانات مضيئه ضخمه تقول لك مثلا فيه
حادثه بعد كذا و هدى السرعه أو الطريق الفلانى مقفول
دلوقت ! يعنى رسائل موجهه مستمره للسائقين ! والطريق
نفسه طالع ونازل بس على مسافات بعيده و زاوية ميل
بسيطه و على الآجناب بيوت متناثره جميله كلها من طابق
واحد أو اثنين على الآكثر بسقوف هرميه قرميديه حمراء
و طراز أوروبى هولندى ! الآروع بقى الآرض الممتده يمينآ و
يسارآ كلها أخضر فى أخضر و مافيش جبال ولكن مرتفعات
و منخفضات سبحان الله زى أمواج البحر المتلاطمه لكن
بانحناءات واسعه لطيفه ! و على جانبى الطريق توجد
اعلانات بس على عواميد عاليه جدآ و بعضها لا مؤاخذه فيها
( قلة أدب ) ! وفيه كوبرى عمودى على الطريق معمول عليه
كافيتريا بحيث تكون فى الكافيتريا والطريق يعبر من أسفل !
واقتربنا من مكان الدرس على مشارف جوهانسبرج فى
منطقه كلها معارض سيارات مستعمله بس والله شكلها كلها
جديده ( ولا غلطه ) ! وطبعآ جنبها أعلام واعلانات بالانجليزيه
طبعآ منظر مبهر للى زينا ! و علمت أن الجمارك السيارات
هناك وكل شىء 13 % فقط واذا خرجت بها من البلد يعطوك
ال13 % دى وانت خارج ( استرداد ) ! جتنا نيله فى حظنا
الهباب ! معلش أنا طولت فى الوصف بس علشان تعيشوا
معايا و غدآ ان شاء الله نستكمل الحكايه ( أهه فيه سيارات)!
Dr. Bolbolan 
منظر جانبى للتلال الخضراء
مدخل طرفى لجوهانسبرج
اشارة مرور معاكسه
معرض سيارات من بعيد
برده معرض سيارات من بعيد
مزز - كنت واقف أدخن معاهم ! أى والله !