السلام عليكم يا مصر موتورز
رجعت لكم بعد غياب طويل عن المنتدى مع انى كنت فى مصر
الحمد له رجعت الكويت بعد رحلة السفر البرى المليئة بالمغامرات و الحمد لله قابلت المهندس سومو و المهندس اسلام جلال فى عروس البحر الابيض المتوسط قبل السفر باربعة ايام و انا بجد كان نفسى اقابل كل الناس و كل اخواتى فى مصر موتورز و خصوصا بعد ما قابلت سومو اللى مش ممكن تقدر تزهق و انت قاعد معاه و المهندس اسلام اللى بجد تتمنى يكون لك اخ كبير زيه و مع ان الوقت كان ضيق بس بجد استمتعت جدا و اتشرفت انى قابلتهم و اتكلمنا فى حاجات كتير و ما شاء الله عليهم فاهمين قوى فى العربيات يا رب يكون عندى حتى ربع المعلومات اللى عندهم
و لفينا شوية انا و سومو فى اسكندرية و رحنا اتفرجنا غلى فيات برافو فى توكيل فيات و رحنا جراج ميشيل احد شفنا الكام عربية التعبانين اللى عنده فيرارى على لمبرجينى على حاجات كدة و بعدين رحنا ضربنا ايس كريم فى بحرى بجد كانوا يومين جمال جدا
و الاستاذ وائل ابو نورا مشكورا كلمنى و قال لى ان ميعاد المقابلة هيبقى 31 يوليو للاسف مكنش ينفع معايا لانى انطلقت من مصر يوم 30 الف شكر ليك يا ابو نورا على اهتمامك و ده مش غريب عليك و يارب اقدراشوفكم قريبا فى اقرب فرصة
و انا بفكر بصراحة ان احنا نعمل مقابلات مصر موتورز فرع الكويت للاعضاء الكرام المقيمين فى الكويت ,,, ربنا يسهل يا رب و ننظمها قريبا ...
و انتظروا موضوعى عن رحلة السفر البرى من الكويت الى مصر و رحلة الرجوع ايضا ...
و ربنا يبلغنا جميعا رمضان و نحن فى اتم صحة و عافية و كل خير يا رب