رد: مشكاح وريما 2009
-12-
قررت ريما أخيرا أن تكون الحاجة ريما!!!
بعد حكاية خطف الموبايل وفى آخر عملية كادت أن تنكشف وطاردها الرجل ولانها خفيفة رشيقة نطت فى الاتوبيس كنسناس أفريقيا الوسطى وخلعت بالمحمول وأخذت قرار التوبة!!
عرضت على الشيخ مشكاح فكرتها!
نعم أصبح مشكاح الشيخ مشكاح بين يوم وليلة!
ريما تندس بين النسوة وكلمة اتنين بعد ما تسمع مشكلتها تدلها على الشيخ مشكاح أبو سر باتع 00حلال المشاكل والعقد ومسخر الجان والعفاريت الزرق والحمر والفوشيا!!
جلبت ريما أول زبونه الى بيت الشيخ مشكاح 00
تركتها عند الباب الخارجى 00 بعد أن عرفت منها التفاصيل 00
بسرعة البرق كانت تدخل من الباب الخلفى وتلبس النقاب وتفتح الباب
-أهلا وسهلا يا أختى
-الشيخ مشكاح موجود
-موجود يا أختى تفضلى
-ممكن أقابله؟
-الشيخ عنده جلسه 00شوية وح يفضى 00تشربى أيه؟
-معلش أنا مستعجلة
-دقيقة واحدة
دخلت ريما لتخبر مشكاح بما لديها من معلومات
ودخلت السيدة
نظر اليها مشكاح وقال فى صوت هادىء ورخيم:
-مرحبا أخت سعدية
بهتت السيدة:
-أنت عارف أسمى يا مولانا
-طلباتكم يا أختنا
-أنا 000
قاطعها مشكاح:
-جوزك
-الله أكبر 00الله أكبر
بركاتك يا مولانا
-شوفى حل مشكلتك سهل00
يومين وجوزك ينعدل ويرجع لك
-ح يسيب البت اللى ح يتجوزها يا مولانا
-ان شاء الله يا أخت سعدية
بس فيه طلبات
-أنت تأمر يا مولانا
-لازم الاسياد تتعشى من ايديكى
-على عينى 00أحلى أكل
-وكمان تدبرى لنا ورقتين بمية
-أنت تأمر
-الفلوس دى لزوم الأسياد مبتحركوش الا لما أولع لهم فى الفلوس00
حاكم ده مزاج عندهم وأمرنا لله
-حاضر حاضر يا مولانا
-سيبى عنوانك وصورة جوزك مع الاخت بره
-حاضر
-العشا يكون هنا بكرة ومتنشيس
-قبل العشا ح يكون هنا
-متنسيش الرومى والحمام والبط
ولو فتة كوارع يبقى مية مية
-أيه؟!!!!!!
-آه00أصل الاسياد بيحبوا الاكل ده وانا عايزهم يعملوا معاكى أحلى واجب
أطعم الفم تستحى العين
انطلقت السيدة غير مصدقة وفى قمة السعادة
ذهب مشكاح فى المساء يترصد زوج السيدة
وبعد أن ترك الفتاة التى سيتزوجها 00
أقترب منه وغز مطواة فى جنبه00
زعر الرجل :
-أنت عايز أيه؟
قال مشكاح:
-عمرك
-ليه أنا عملت أيه؟
-شوف يا خفيف البت اللى كنت معاها دى بتاعتى 00أنا اللى ح أتجوزها00
لو قربت منها تانى ح أسيح دمك00
أنفد بعمرك00
ده آخر تحذير
-أنت مين يا جدع أنت؟
-أنا قلت ده آخر تحذير00
جرحه مشكاح فى وجهه جرحا سطحيا
-أنا قلت ده آخر تحذير 00
المرة الجاية ح يبقى فى المليان
روح ربى عيالك وأشترى عمرك
أنطلق الرجل كالفأر المذعور يهرول بكل ما أوتى من قوة!!
عاد مشكاح الى البيت وهو يشعر بالانتصار وعندما رأى الوليمة أنفرجت أساريره00
قالت ريما:
-الوليه عاملة أكل يكفى أسبوع
-يا رمرومتى 00أصرف ما ف الجيب 00
أحيينى النهاردة
أقعدى 00دا الاكل باين عليه مانجة
وجلس مشكاح يلتهم و يلتهم ولاول مرة لم يستطع أن يقضى على الاكل كاملا فقد خر من الشبع والتخمة !!
ارتمى على الاريكة على ظهره وكرشه الضخم يطبق على أنفاسه
تتبع
__________________
|