كنت اشتريت عربية تيجو(2000 سي سي اتوماتيك) من شهر 9 سنة 2010، وكانت فيها ترخيص 3 سنين وماشي بالتوكيل (للعلم ، كانوا تلات توكيلات والعربية ما عملتش 900 كيلو
) المهم الشيطان قعد يلعب في مخي ويقولي سجل العربية وانا اقول يا عم بلاش عفرتة ما ناقص سنة ونص كمان ولا انت غاوي بهدلة ووجع قلب، يقولي ما اديك قاعد فاضي والشغل مريح روح سجل بدل ما في كل كمين يقولولك التوكيل فين
وانت كده كده مش شايلوه، مش ناقصين حد غلس، اقول يا عم انت عارف البهدلة بتاعت الموضوع ده، يقولي يهون في سبيل الرخصة تبقي باسمك مش يمكن العربية تتطلع مسروقة ما انت عارف موضوع الثورة ، اقوله ثورة ايه ما انا شاريها قبل الثورة، يقولي وش ضمنك، المهم سمعت كلامه وللي مش عارف انا ساكن وشغلي في مدينة نصر والعربية مرور فيصل والبطاقة حلوان
المهم قولت استعانت علي الشقا بالله وروحت طالع علي الشهر العقاري، وعامل عقد بيع لنفسي وكله زي الفل، لغاية ما قالولي ادفع الرسوم كام يا برنس 1560 جنيه يا نهار كوبية ، ليه يا عم يقولي هو كده ، يا حكومة تييتتتتتت ادفع كله ده ليه والنهاية اني دفعت وانا بسب في اللي اقنعني بفكرة نقل الملكية اصلا.
سجلت العقد وطلعت علي مرور فيصل، شهادة مخلفات يا جدعان، وديه كانت اسهل حاجة لقيت نيابة المرور فاضية، ومخدتش 5 دقايق والحمدلله مكانش علي مخالفات والموضوع كله الخمسة جنيه بتاعت الرسوم، بوست ايدي وش وضهر وانا عمال اسمع في مبالغ خرافية في النيابة اللي الف واللي 3 .
تاني يوم الصبح بدري خت كل الورق وصورت كل حاجة وطلعت علي مرور حلوان، اشتريت ملف الفحص "25 جنيه" ودخلت افحص وكله تمام وطبعا المهندس الظريف بقوله همتك يا باش مهندس وعنينا ليك، قالي لما تيجي بالسلامة قولتله اجي منين قالي بعد ما تعمل مطابقة البصمة في فيصل ، تييييتتتتتتتتتتتتتتتتتتتت تت فيصل مين قالي التعليمات ان كل العربيات تعمل مطابقة بصمة، قولتله يا ريس ما نا معايا شهادة مخلفات وفيها رقم العربية والموتور والشاسية من فيصل والرخصة سارية اروح فيصل ليه تاني، هو انا شاري مرسيدس، هو في حد هيسرق عربية صيني ، قالي والله نفسي اخدمك بس التعليمات كده.
اقعدت طبعا اسب والعن في صاحب الفكرة من الاساس ، ما انا ماشي ومكبر دماغي ومحدش بيكلمني ، قولت اكبر واروح وبلا نقل ملكية بلا نيلة، لقيت ال 1560 جنيه بيوجعوني قوي، قولت ما بدهاش، نطلع علي فيصل.
ضربت الطريق 120 - 140 لدرجة ان انا كنت باخد غرز من قدام ظابط مرور راكب موتوسكل وقفلت عليه من غيظي كان هيلبس في عربية نقل
بس قولت لو حد وقفني هديهم الدوسية والمفاتيح والعربية وأعمل اعتصام مفتوح في اي نيلة.
وصلت فيصل، دخلت القيت نظرة علي المرور ، ايه الزحمة ديه، ابو ديه فكرة، لقيت واحد قالي عايز حد يخلصلك في 5 دقايق قولتله بكام، قالي 100 تخليص و30 جنيه مصلحتي ، قولتله ال30 جنيه علي عيني وعلي راسي وادهملك دلوقتي من غير حاجة، ال 100 كتير قوي، هما 50 لكل حاجة انا لسه هدفع في حلوان، المهم وافق وخد الورق، وقعد علي القهوة شربت الساقع 10 دقايق ولقيته جايب مطابقة البصمة بس قالي استئذنك تختمها انت من الظابط وهو مفيش عنده حد، قولت مصلحة ختمنا الورق واخت العربية ورجعت حلوان كانت الساعة بقت 12، دخلت علي الفحص وختمت الاوراق، وكان معايا الطفاية ختمت الورق بتاعها. كله هنا كان زي الفل.
روحت اشتريت ملف نقل ملكية (10 جنيه) ودفعت التامين الاجباري سنة ونص (160 جنيه) يا دي المصاريف اللي ملهاش لزمة، وجريت علي الشباك بتاع نقل الملكية.
صباح الخير، ده انا اللي بقول، صباح النور حضرتك عاوز ايه، كنت هردعليه واقوله ب 2 جنيه فول، بس قولت امسك اعصابك وبلاش دلوقتي دا انت لسه رازع مشوار فيصل رايح جي، قولت وانا راسم ابتسامة عريضة، عاوز انقل ملكية العربية مش ده شباك نقل الملكية برضه، الراجل قالي الرخص والبطاقة، اديتهملوا قالي شوف الخزنة فاتحة ولا قافلة ، قافلة مين الساعة ما جتش واحدة، روحت رايح الخزنة قولتله بيسالوكوا شغالين، قالي قولوا حسب التعليمات اللي عندكوا، تيييتتتتتتتتتتت ده في سري طبعا ما انا مش عاوز اجي تاني، رجعت للشباك، بيقولك حسب التعليمات اللي عندك ، قالي يبقي احنا قفلنا، قولت اه فهمتك وروحت مطلع فلوس حاططها مع الرخصة والبطاقة وقولتله امسك بس الرخصة وهي تفتح (وسلام كبير قوي للثورة والفساد) راح واخد الحاجة والملف وابتدي يشتغل وروحت انا فكيت النمر، المهم دفعت كام 365 جنيه مصاريف ، يحرق ديه فكرة. ليه يا عم الفلوس ديه قعد يقولي مش عارف ابصر ايه وما اعرفش ايه لغاية ما قالي 100 جنيه تامين لوح ، قولتله مش في لوح معايا انا هرجعها قالي اه، ومدفوع عليها 100 جنيه تامين، قالي اه، قولتله واللوح سليمة اهي، انا عاوز ال100 جنيه اللي كانوا مدفوعينلها. فتح بقه مع نظرة بلهاء وقالي مينفعش، قولت ليه مينفعش ، مش التأمين ده بيرجع لما ارجع الحاجة، قالي يا بيه خلصنا ورانا شغل وعندك الظابط اشتكيلوا، هو احنا بناخد الفلوس في جيبنا، قولت طب هات الورق خلي اليوم يعدي علي خير.
سلمت النمر وقعدت استنيت الرخصة لغاية ما نادوا اسمي وبصيت علي الرخصة، تصريح 3 شهور لغاية ما الملف يجي ، ده ان جه اساسا.
خت الرخصة واستلمت بيها النمر بالمسامير ، طب حد يركبها قالي معندناش فني، ركبها عند اي ميكانيكي، حاضر روحت واخد النمر وحاططها علي التابلوه ومروح بيتنا لغاية ما افضلها.
ونهاية اليومين دفعت اكتر من 2000 جنيه ومشورة ووجع قلب ولسه رايح تاني بعد 3 شهور.