[AbOnOrA]

اهلا بيك يا استاذ حسنين

مبدئيا ً خلينا نفصل بين الاستفسار عن مشكلة فنية ويبقى فى الموضوع ده واذا حضرتك حابب تسال عن عربية تانية او تعمل مقارنة بين اكتر من نوع يبقى نعمل موضوع تانى فى القسم الناسب لموديل السياراة او فى قسم المقارنات علشان تلاقى رد سريع بإذن الله

بالنسبة لمشكلة السخونة فى عربيتك ياريت توضحلنا نوع العربية وبتسخن امتى بالظبط هى مع السرعة زى ما بتقول ولا مع التكييف زى ما بتقول برضو ولا مع الاتنين
وهل معنى كده انك لو مشيت بالعربية لاى مسافة بدون تشغيل التكييف او تعدى سرعة 120 مش بتسخن ؟؟

عامة مشاكل سخونة المحرك يفضل الكشف ومراجعة النقاط التالية اولاً

- الكشف على احتمالية فساد الجوانات او وش السلندر وده بانك تبص على فتحة الزيت وتشوف طبيعة الزيت عادية ولا متغيرة وتشوف فتحة الريداتير مع تزويد السرعة بتطلع هواء ولا لاء

- تاكد تماماً من صلاحية الزيت وحالتة وعدم نقصانة

- تاكد من صلاحية نظام التبريد (الريداتير) وعدم وجود تسرب (فى الحالة ديه هتلاقى المية بتنقص)

- تأكد من صلاحية غطاء الريداتير وانه مش بيهرب ابخرة (فى الحالة ديه هتلاقى المية بتنقص)

- تاكد من حالة وكفائة خراطيم دورة التبريد وخلوها من الشقوق واو الفتحات (فى الحالة ديه هتلاقى المية بتنقص)
- تأكد من سلامة المجارى المائية فى سربنتينة الريداتير وعدم انسدادها

- تاكد من عمل مروحة التبريد بسرعة كافية
- تاكد من عمل ترموستات الحرارة وانه بيشتغل وبيفصل بشكل منتظم وعند درجات حرارة ثابتة
- تاكد من صلاحية سير مروحة التبريد

اذا كان كل ده سليم يبقى فيه احتمال قصور فى إداء طلمبة الزيت او ممكن مؤشر الحرارة فى التابلوه يكون بايظ

ديه اشهر الاحتمالات