[TheEmmH]

السلام عليكم انا النهارده روحت ابو الفتوح المركز الرئيسى الى فى المعادى
المهم انا فى دماغى اجيب عربية جديدة اسبرانزا قريت على كام موقع ان سعر التيجو الــ 1600 سى سى بقى حاجة وستين قلت تمام اوى بعد ما روحت اكتشفت حاجة غريبة ضايقتنى هناك فى المركز بتاع ابو الفتوح
1- الى شغالين هناك اسلوبهم عجيب شوية ومفيش خدمة كويسة حتى سألته سؤال عن انها اوتوماتيك ولا مش بينزل منها قالى لا طبعا واتكلم بطريقة مريحتنيش الحقيقة بس مش ده المهم
المهم ان ابو الفتوح مش منزل اى عربية اوتوماتيك غير تيجو 2000 سى سى ودى عرفت ان سعرها بقى فى رنج 105 لحد 120 ده المانيوال طبعاً والاوتوماتيك الحقيقة الاخ الفاضل ما فادنيش بيها اصلاً وطبعاً لو كنت قلت له اصور اى حاجة ولا طلعت موبايل حتى كان ممكن يفجر فينا قنبلة هههههههههههه
المهم انا بكتب الموضوع ده بهدف انى اعرفكم اخر الاسعار فى ابو الفتوح وفى المصرية
الاسبرانزا الــ m11 لقيتها فى ابو الفتوح بــ 75 الـف وقالى فى عرض هيخلص كمان يومين انها بــ 72 الف
وقالى ان الــ m12 بــ 76 الف ومعمول عليها عرض برده 73 الف
والاسبرانزا الــ a516 ولا اتغير شكلها ولا حاجة اصلاً وقلت له حسسنى انى بهيس عليه ويقولى كلام مش صحيح اصلاً وان شكلها زى ماهو ومفيش منها غير مانيوال بس وسعرها 70 الف
وسألت على الاسبرانزا التيجو 1600 سى سى لقيتها بــ 90 الف وبرده مفيش منها اوتوماتيك كله مانيوال الى فى المصنع وفى مصر كلها وعرفت ان الاوتوماتيك مش بتنزل غير فى الــ 2000 سى سى
كــل ده كان فى ابو الفتوح مشيت بقى من عنده وقابلتنى المصرية فى طريقى قلت انزل اشوف ايه الكلام
لقيت الــ m11 هناك بــ 71 الف
ولقيت التيجو الــ 1600 سى سى هناك عنده بــ 86 الف جنيه مانيوال طبعاً وعرفت ان فعلاً مفيش اوتوماتيك منها
وشفت الـ 516 سعرها برده 70 الف
والــ m12 سعرها كان 73 الف
وعملى خطة اسعار وعرفنى لو جبتها قسط هتكون ايه الاجراءات والحقيقة هناك ناس زوق جداً
بس مفيش حاجة خلتنى اصرف نظر منهم بنسبة 30% غير الفائدة لانها كبيرة جداً
يعنى انا هجيب الــ m11 هدفع النص وهياخدوا على الباقى 30 الف على حق العربية يعنى هتبقى واقفة بــ 100 الا كام الفاية كده :D
فا انا مش عارفة اعمل ايه بقى ؟ ؟
انتوا ايه رأيكم فى الكلام ده ؟
واتمنى اكون عملت حاجة مفيدة فى موضوعى ده وعرفتكم الاسعار