كان عندى مشكلة غريبة الاسبوع الماضى.صوت غريب يظهر عند الغيار التالت اول ما ابتدى اشد مع اى حد يطلع الصوت يقولى اعقل يا واد
لا العربية تقف منك و يبقى منظرك مش حلو
قلت اريح نفسى واعرف الصوت منين ركنت و قعدت ع القهوة و فكرت مع نفسى
يا ترى دى العفشة ؟ كبالن او بلية كاوتش ؟ لأ لان الكبالن لو باظت بتعمل صوت طقة لما اكسر الدركسيون و بلية الصرة بتعمل صوت خشونة ودانى حافظاه. بلاش العفشة.
ممكن تكون كهربة؟ و ندخل فى حوار فك المارش و بليه الدينامو و الكلام دة
او ميكانيكا ؟ و يكون صوت سير او بلية او المكنة عايزة حاجة
مكنة والعمرة اللى من شهرين دى كانت
طلعت على الميكانيكى و الحمد لله كان رايق و حكيتله الحكاية من طقطق ل سلامو عليكم
جربنا العربية و الحمدلله الصوت طلع . احيانا تبقى العربية فيها حاجة مجنناك و عند الميكانيكى تلاقيها زيرو
كشف على العربية و قاللى انت غيرت زيت الفتيس امتى؟ هو زيت الفتيس بيتغير
اشتريت العربية من 4 سنين و حتى ماعرفش مكان طبة الفتيس
فتح لقى الزيت كامل مش ناقص بس محروق جدا و لونه اسود غريب و الفتيس صعب عليا
وحطينا زيت موبيل 90 و تم حل الموضوع و الحمدلله من غير اى اشتغالات.
الصنايعى الامين و اللى فاهم بيريح كتير