المشاركة الأصلية كتبت بواسطة M-Fire Dj
بسم الله الرحمن الرحيم
انا عضو جديد معام في المنتدي يمكن مش جديد اوي بس دي اول مشاركاتي تقبلوني عضو خفيف ان شاء الله
دي اول مشاركه ليا في المنتدي هنا بس بجد كان لازم اشارك لاني شايف ناس كتير اوي متحامله على الميجان
طبعا مش هتكلم على الشكل والحاجات دي ولا التكنولوجيا الرهيبه اللي فيها لان المنتدى مليان من الكلام ده انا هتكلم فقط عن تجربتي مع العربية يمكن اوضح للناس حاجات بسيطة
العربية حلوة جدا قمة الفخامة لكن بالنسبة للموتور مش هيديك الاداء الرياضي المطلوب بالنسبة لبعض الاشخاص اللي انا واحد منهم
انا معايا موديل 2008 خليجي العربية ماشاء الله تمام على الطريق عربية تحفة لحد 180 ( دي اعلى حاجة جربتها بيها لحد دلوقتي ) والعربية معايا بقالها 7 شهور تقريبا
عملت 11000 وعملتلها صيانه ال10000 من فتره والسعر مش كبير اوي كان حوالي 560 جنيه تقريبا بما فيهم تمن الزيت والفلاتر وتربيط عام على العفشة وكشف كمبيوتر كامل وده كان في التوكيل ( العدوي فرع المنصورة )
بس هيا عملت معايا حركة اول ما جت بعد 2000 كيلو بالظبط طرمبة البنزين عطلت ودا كان عيب تصنيع ودا وارد في اي عربية في العالم والدليل على كده اللي حصل مع تويوتا العالمية وسحب العربيات ودي اتكررت مع اكتر من شركة عالمية
والحمد لله تم تغيير الطرمبة على حساب الوكيل في السعودية وكان تمنها حوالي 2200 ريال سعودي بس مدفعتش حاجة لانه كان عيب تصنيع مع العلم اني واحد صاحبي معاه ميجان 2008 خليجي برضه وعملت لحد دلوقتي 18000 ومغيرش الطرمبة يعني دا مجرد احتمال بس وده في كل العربيات موجود عيوب التصنيع
وبعد ما العربية وصلت مصر بالسلامة حصل مشكله تانية ماكينه رفع الازاز عطلت ptmnlo123per144
طبعا سألت عليها عند العدوي كانت عامله 2100 جنيه بالتركيب وكنت هدفعهم من معايا لان الضمان كان في السعودية بس
ولكن الحمد لله فكرت صح وكان قدامي حلين
الاول هو الحرفيين والتاني هو بورسعيد
ولجأت للحل التاني بالتليفون جبتها من بورسعيد وده عن طريق واحد شغال في قطع غيار الرينو هنا في المنصورة وانا زبونه من سنه 1997 ( عشان معايا اوبتيما 97 كمان )
المهم بالتليفون جبناها وصلت تاني يوم مع الراجل بتاع بورسعيد وكان تمنها 500 جنيه طبعا دي استيراد مش جديدة ولكن هي في الحقيقة افضل من الجديدة لانها بالصدفة كانت مفكوكة من عربية هاتشيباك يعني كانت صناعة فرنسية واعتقد ان الجديدة مش فرنسي
الراجل ركبها هو في نص ساعة وخد 100 جنيه تمن التركيب والتوصيل لحد المنصورة هنا وتمام الحمد لله شغاله زي الفل
كده ب 600 خلص الموضوع
وبرضه دا عيب وارد وجودة في اي عربية اخري
ولكن بجد العربية ادائها حلو عفشتها حلوة اوي والموتور زي ماقلت حلو بالنسبة لبعض الناس ولكن بالنسبه للناس الللي بتحب الاداء الرياضي مش هيمتعهم الموتور ده
ولكن برضه لو جربت تمشي بيها على وضع المانيوال هتلاقي فرق كبيير جدا وملحوظ في الطلعة الاولى وفي السحب وفي كل حاجة هتحس ان العربية اخف من الاول ( انا بستخدمه على طول )
ولكن بالنسبة لقطع الغيار الخارجية ( الفوانيس وغيرها ) ف الميجان ارخص من اي عرية تانية في فقتها زي الكورولا مثلا او الالنترا او السيراتو رغم اني بعتبر دول اقل منها بكتير ولكن المشكلة في بعض القطع الداخلية
ومتوفرة جديدة واستيراد كمان بالنسبه ليا مفيش مشكله في القطع خالص بصراحة الراجل ده مظبطني في القطع يعني مثلا تيل الفرامل على ما اذكر كان عامل 190 و 230 امامي وخلفي صناعة اسبانية
وبالصدفة امبارح كنت عند الراجل عرفت كمان ان بدأ يجيب ليها انصاص كامله بالموتور والعفشة يعني نص فاضي او مليان يعني كده تقريبا كل مسمار فيها موجود استيراد واغلب الحاجة موجودة جديدة وبأسعار اقل من التوكيل بكتير
لكن لازم يتركب في التوكيل وده سر الحفاظ على العربية دي فعلا ( عن تجربة في اوبتيما كمان ) سر الحفاظ على الرينو هو التوكيل مش شرط في القطع لكن على الاقل في الصيانه والتبديل هات القطع من بره وركبها في التوكيل ( النظيف نظيف برضه )
والمفاجئة المذهله كان سعر النص اللي سمعته منه امبارح
النص فاضي يعني شاسيه فقط ب 2000 جنيه بس
يعني انت لو رايح تجيب نص 128 هيكون اغلى من كده
طبعا ربنا ما يحوجنا للانصاص ابدا يارب بس القصد هو توفر جميع قطع الغيار
وكمان موجود موتور كبير للعربية 1800 و 2000 لهواة تسقيط المكن زيي كده
في النهاية اتمنى اني اكون وضحت حاجة بسيطه بس للناس من خلال تجربتي للعربية
واي حد عنده استفسار انا في الخدمة
وارجوا ان تتقبلوني ضيف عليكوا في المنتدى
اسف للاطاله
|
تجربة جميلة جدا وربنا يحفظلك العربية ان شاء الله