[Marlborooo]

عايز اقول حاجة بخصوص الحل ايه ؟؟؟
طبعا الكلام اللي قاله استاذ تامر كلام زي الفل بس عايز اقول حاجة : بخصوص السواق اللي بيشرب مخدرات ، هو السواق ده بيشرب ليه مش عشان يقدر يسوق مسافات طويلة بدون راحة ، طيب هو ايه اللي يخليه يشتغل فترات كبيرة ، مش عشان يقدر ياخد من صاحب العمل مبلغ يعيشه هو واسرته في مستوي اجتماعي متوسط

يبقي الحل ان الناس ديه يتوفرلها ظروف شغل ادمية بمرتب يعيشه في مستوي اجتماعي متوسط
يعني صاحب العمل يشغله ال8 سعات القانونية ويوفرله يوم اجازة بمرتب يقدر يأكل منه عياله واي ساعات اضافية تكون باوفر تايم ، الكلام ده لو متوافرش يبقي محدش قدر يلوم السواق اللي بيشرب مخدر عشان يقدر يستحمل السواقة لعدة ايام متواصلة اللي فوق قدرة احتمال اي انسان ، وهو بيشرب مخدر وهو عارف انه هيضره بس لازم عشان يقدر ياكل عياله، اما لو توافر الكلام اللي بقوله يبقي ساعتها السواق اللي يشرب مخدر اقطعوا رقبته
يبقي العيب مش علي السواق العيب علي صاحب العمل اللي بيطلب من السواق معدل شغل مفيش انسان يقدر يستحمله والمفروض نحاكم اصحاب العربيات النقل مش السواقين


والناس اللي بتلوم علي السواقين عايز اقلهم حاجة ، سواق النقل اتواجد في ظروف صعبة وبيشتغل في ظروف صعبة كان ممكن اي حد يتحط فيها ، يعني انا مثلا خلصت كلية حقوق عشان اهلي صرفوا عليا ايام المدرسة وصرفوا عليا ايام الكلية يعني اتوفرليا ظروف مناسبة، وكان ممكن لو اتواجدت في ظروف مختلفة الله اعلم كان زماني بشتغل ايه ، احنا مبنخترش نبقي ايه ربنا هو اللي بيوزع الارزاق وفيه توفيق ربنا ، فبلاش يا جماعة نبص لاي انسان بنظرة دونية لمجرد انه اتواجد في ظروف وشروط غير ملاءمة كان ممكن اي حد يتحط فيها وطالما بيشتغل شغلانة شريفة يبقي احترمه واحطه علي راسي