[top gear]

انا في رأيي ان الدولة لما انشأت مدن جديدة انشأتها للأسف بالقرب من القاهرة زي العبور والشروق و التجمع الخامس و اكتوبر ،

وغالبية الناس اللي ساكنة في المدن دي شغالين في القاهرة يعني كل يوم لازم ينزل القاهرة ويرجع اخر النهار فبيعمل أزمة وهو نازل الصبح وأزمة وهو راجع اخر اليوم

و 90% من الشركات والمصانع والمشاريع الكبرى وشركات الاتصالات وشركات البترول و .... متركزة في القاهرة دون باقي المحافظات ،

ليه متتوزعش المشاريع والشركات الكبرى على باقي المحافظات بحيث ان الراجل اللي من قنا مثلا يشتغل في قنا واللي من طنطا يشتغل في طنطا وتتفك الزحمة عن القاهرة ..

انت لو خذت بالك ان التوسع العمراني في القاهرة بقى كبير بشكل جرثومي مثلا على طريق الاسماعيلية الصحراوي وانت رايح مدينة العبور بدأت تتبني أحياء جديدة على شمالك ومفيش طريق يودي القاهرة إلاّ طريق اسماعيلية الصحراوي اللي هو حاليا مش مستوعب العربيات اللي جاية من العبور والشروق ... انا حاسس ان كل الناس اللي في الاقاليم هيسيبوا بلادهم وييجوا يشتغلوا في القاهرة ويسيبوا بلادهم فاضية مفهاش بني ادم





///