رد: مشكاح وريما 2009
-4-
ذهبت ريمال للسوق تشترى طلبات البيت بال200 جنية ولما عادت كان مشكاح فى انتظار وليمة الغداء فى ترقب00
وبعد ساعات00
جلس مشكاح امام دكر البط والوزة ليقضى عليهما فى دقيقتين مع تناول اصابع الكرنب ازواجا فنسف كرنبة بحجم كرشه الضخم ثلاث مرات00
وصينية بطاطس00
وحلة ملوخية
وخمس ارغفة بلدى مفرود
بخلاف حلة الارز
وعندما نظف الصحون00
وضع يده على بطنه ونظر لريما00
قالت:
-كل ده ومشبعتش00
معدشى فيه الا اتنين كيلو لحمة بتوع بكره
-قومى هاتيهم خلينا نكمل اكل
-عندك جوة نيين روح كلهم ما أنت انسعرت
-هوه كل يوم لازم أقوم من على الاكل جعان
ايه العيشة دى؟!
-عيشة هباب على راسك00
انا مش عارفة معدة ايه اللى بتشيل ده كله!!
تعرف لما تموت أنا ح أبيع معدتك للمتحف الناس تتفرج عليها لانها أكيد أكبر معده فى العالم
قام من على الاكل وهو يقول:
-جتك البلا سديتى نفسى
قالت:
-هيه بتنسد أبدا!!
ده أنا لو حطيت قدامك كلب ميت بقاله شهر عمر نفسك ماتنسد
قال بقرف:
-ولية حيزبون
-أيه حلزبون دى؟
-أنا عارف 00أهى شتيمة وخلاص
-بتشتمنى يا حشملة
-أيه حشملة دى؟
-يعنى نطع بالهندى
-بتعرفى لغات يا بنت نفوسة الندابة
آدى أخرة الفرجة على الدش
المهم عندك ايه النهاردة
-نفس السبوبة00
المرة دى نختار مطعم عيلاوى فى الميدان من بتوع الناس الهاف لايف
-حلو قوى00
بس بقولك أيه شوفى فار محندق شوية عن الفحل بتاع المرة اللى فاتت
************************* *****
وعندما جاء المساء00
ارتدى مشكاح البدلة الزفرة00
وتدلى كرشة مترا وأصبحت أزرار البدله عند جانبيه من فرط ضخامته وحاجته لمقاس اكبر بعشرين نمرة على الاقل
وارتدت الكونتيسة ريما القديمة فستانها الجديد الذى بدت فيه كالبوصة داخل شوال قطن وفى الاعلى شهرها وقد خاصمت خصلاته بعضها البعض فبدا كشعر أمنا الغولة
دخلوا المطعم منتفخين
جلس وهو يصفق للجرسون كانه فى قهوة بلدى00
كاد الجرسون أن يغمى عليه ومشكاح يطلب الاكل00
قال :
-فيه سعادتك ناس معزومين معاكوا؟
-آه 00آه
جايين بعد شوية
والنبى الاكل بسرعة
وبعد دقائق جاء طابور يحمل الاكل الذى امتلأت به منضدتين00
وانكب مشكاح فى التهام ديك رومى محشى كانه عصفورة ثم الحمام الواحدة تلو الاخرى
يتخللها قطع الكباب والكفته قبل ان يأخذ استراحة00
قربع زجاجتين بيبسى ثم تجشأ بقوة أثارت قرف كل الموجودين
قالت ريما:
-يخرب بيتك بالراحة فرجت علينا العالم
-معلهش مخدتش بالى أصل الاكل حلو حلاوة يا بت
وأكمل التهام الطعام وقبل ان تفرغ الاطباق 00
تلفت حوله قبل أن يخرج الفأر ليضعة فى الطاجن00
وقبل أن يضعه كانت يد الجرسون تمسك به00
قال الرجل:
-شايفين يا جماعة الراجل بيعمل أيه؟
ورد الجميع :
-كلنا شايفين وشاهدين00
قال الرجل:
-أتفضل معانا جوة للمدير
ودخل مشكاح وريما مجرورين من العاملين
قال المدير:
-أنت جاى تصيع علينا
قال مشكاح بغضب:
-محبش الاسلوب ده
قال المدير:
-ماشى 00الحساب يابيه
ومع السلامة ولا كأننا شفنا حاجة
قال فى صفاقة:
-معييش
قال المدير:
-أطلب البوليس
قالت ريمة:
-يا لهوى بوليس أيه؟
احنا ناس غلابة يابيه
سماح يا أهل السماح
قال مشكاح بصوت عالى:
-بوليس بوليس
أطلب يا أفندى
أنا ميهمنيش
وجاء رجل ضخم من خلف مشكاح ورقعه على قفاه قلم طرقع فى مساحة كيلو
صرخ مشكاح:
-ياولاد ال0000
وثار كالثور وأخذ يحطم فى أثاث المكتب00
وريما تصرخ
انقض عليه العاملون ضربا وركلا حتى سقط كالثور لكنه قاومهم وهاج فيهم أكثر00
يبطح هذا ويجرح ذاك00
ودخلت الشرطة لتقبض عليه00
جرجروه على القسم وريما تندب خلفه
تتبع
__________________
|