[Ma7moud ShedeD]

انا الحمد لله رخصت العربية انهرده و زى ما قلتلكوا انى ان شاء الله هعمل تقرير بعد الترخيص و انزل صور للعربية..و ادينى الحمد لله فضيت شوية و عرفت افتح المنتدى..ندخل فى الموضوع..العريبة اول ما استلمتها كانت لسة جاية من المخزن و سخنة و كانت عاملة 70 كيلو متر بس انا بعتقد ان ده كتير شوية..المهم خلصت الاجراءات و غسلولى العربية و مشيت بيها اول ما خرجت رحت احط بنزين من البنزينة بس للاسف ما لاقيتش غير 80 قلت لأ طبعا مينفعش اعامل عربية جديده معاملة عربية قديمة زى ال127...المهم مشيت شوية و كنت خايف لتقف منى و البنزين يخلص لاكن الحمد لله لقيت بنزينة تانية فرحت حاطط 10 لتر 90..و مشيت العربية ممتازة بجد و سحبها جامد اوى ما شاء الله تحس ان فعلا متور ماتسوبيشى يابانى بس عشان العريبة لسة جديده و فى فترة التلين مزودش عن 80 او اقل كمان المهم كنت بنقل بحس بى صوت الغيار تحس انو زى ما يكون بيعض على خفيف اوى بس متهيئلى ده عشان لسة جديدة و ممشيتش كتر و على فكرة كنت بنقل على 3 ار بى ام فهل ده كويس و لا استنى شوية و انقل على 4 ار بى ام ؟..بعد كده قلت اجرب التكييف ساخن و بارد شغلت التكييف الساخن لاقيتو تمام شغلت البارد لاقيتو زى الفل..العربية دى تعتبر افضل ماركة صينى و تنافس المركات الكورية فى شوية حجات..و سعرها جميل و امكانيتها روعة بس انا حاسس ان المتور صوتو بيعلى شوية لما ادوس بنزين و الراديو بيقطع شوية و معروف ان الراديو فى مصر زبالة و الفيتس له صوت لما بتيجى تنقل صوت خفيف كده مش مشكلة كبيرة يعنى و الاسبرانزا و الجيلى و الجريت وول فيهم عيوب اكتر من كده بس مفيش حاجة كاملة بس بصراحة و بدون اى تحيز العربية دى احسن من الاسبرانزا بكتير فى الاداء و الكفاءة...و ادى كل الى انا شايفة و دى وجهة نظرى بس الى مدايقنى ان شركة الامل مش عامله دعاية للعربية دى مع انها ممتازة جدا يعنى لولا انى ركبت مع كذا سواق تاكسى معاهم العريبة الجميلة دى كان زمانى لابس و مشترى عربية اسبرانزا..انا شكلى طولت اوى كده و زهقتكم..على اى حال تصبحوا على خير و يا ريت يا جماعة الى يعرف حلول للعيوب دى يقولى عشان اطمن ان العربية بتاعتى سليمة و مفيهاش عيوب تقفيل..