رد: فولت العربية اتدبست فى شليه تايم شير مش عارف ازاى
السلام عليكم
أنا حصل معايا الموضوع ده أول سنه جواز و كنت مع المدام فى راس البر. لاقيت شاب و بنت وقفونا و مفهمش إزاى أقنعونا ( عليهم طريقه إقناع غريبه) و كانوا شغالين تبع فندق و دفعت ال_ 20 جنيه
نمت ليلتها و الفار لعب فى عبى أحلى لعب. و روحتلهم قبل الميعاد كمان. كل هدفى آخد الـ 20 جنيه و محسش إنى أتضحك عليا.
الغريبه قبل ما أدخل الفندق لاقيت شباب من الفندق المجاور لهم بيقولولى. ( الفندق ده مش مسجل تايم شير) , مفهمتش أوى بس حسيت إنها نصبه.
المهم دخلت و قعت الساعتين و جابوا عصاير ( مفيش هدايا و لا حاجه) و واحده قاعده ترغى ساعتين تحسبلك المميزات الرهيبة اللى هتأخدها من المشاركه معاهم.
مش هكدب عليكم. ( مقتنعتش لـ 3 أسباب)
1- كنت عريس جديد و بالتالى تحويشة العمر لسه صارفها و مستلـ.... إحم
2- كنت مركز مع الـ 20 جنيه بس.
3- كلام الشاب اللى من الفندق اللى جنبهم خوفنى أكتر.
المهم خلعت منهم بفضل الله. و أخدت العشرين جنيه و كنت فرحان بيها أوى .
و أول ما خرجت و مشيت بعده ب3 أو 4 فنادق لاقيت شباب تانيه حاولوا يوقفونى لنفس الشئ
هربت و حرمت أروح راس البر تانى أبدااااااا
|