والله يا جماعة من زمان وانا نفسى اطرح الموضوع ده للنقاش بس خايف ناس تتهمنى بالجهل او انكار الاساليب العلمية او حتى الدفاع عن السيارات الصينية
ويعلم الله انى بطرحى للموضوع ده لا ابحث الا عن الحقيقة وتوضيح الامور للناس كلها وانا اولكم
اختبارات التصادم مبدياً شىء معمول بيه من زمان جداً وكانت بتعملة الشركات الكبيرة علشان تختبر سيارتها وتحسن مستوها
وبعدين (زمان برضو) بقت تستخدمها الشركات للدعاية عن منتجاتها ولتثبت للناس ان عربيتها متينة وقوية
لكن طبعاً ده مكانش كفاية للناس انها تصدق لان الاختبارات ديه بتعملها الشركة نفسها صاحبة المصلحة فى اثبات قوة ومتانة السيارة
وفى السنين الاخيرة الماضية نشاءت جهات متخصصة فى قياس واعتماد مستويات الامان للسيارات واشهرها على الاطلاق
NCAP مؤسسة السلامة الاوروبية
NATSHA مؤسسة السلامة الامريكية
ودول اللى غالبية الناس بتعتبر بنتائجهم وتقيماتهم
لكن فى السنتين تلاتة اللى فاتو ظهرت العربيات الصينى فى السوق واختلف الناس عليها ما بين مؤيد ومهاجم ودائما ما كان الناس اللى بيهاجمو العربيات ديه بيستشهدو باختبارات الامان اللى بتتعمل عليها واللى بتظهر ان العربيات ديه هشه وغير امنة اطلاقاً حتى مع وجود وسائل امان فيها لا تتوفر فى السيارات الكورية الموجودة حالياً فى السوق
وبالفعل اقتنع اغلبية الناس بهشاشة السيارات الصينى بناء على نتائج الاختبارات ديه
(مع انها مش اختبارات من جهات معروفة)
للدرجة اللى خلت ناس تتخيل انها عربيات ورق وناس تخيلت ان ابوبها بتقع منها وهى ماشية
او انها ممكن تتفكك لو اخدت مطب جامد
طيب ليه الناس مش بتاخد نفس الموقف من العربيات الكورى القديمة
(اكسنت - برايد - لانوس - ماتيز - نوبيرا)
مع ان اختبارات التصادم بتاعتها كانت سيئة جداً برضو
اختبار تصادم الماتيز
او الاوربى القديم و اليابانى القديم
(شوف الهوندا حصلها ايه هى والجولف)
شوف الفولكس بيتلز العظيمة والجولف حصلهم ايه !!
طيب هل ده يخلينا نقول ان العربيات الصينى الجديدة زيها زى البيتلز والجولف ويمكن احسن كمان لانها فيها وسائل امان !!
صعبة صح
طيب زى اللانوس والاكسنت والبرايد والماتيز والنوبيرا ؟؟
طيب اذا كانت ديه نتائج اختبار عربيات قديمة مجربة ومعروفة ومشهود لها بالمتانة يبقى ايه لازمة اختبارات الامان اصلاً اذا كان ملايين الناس استخدمو العربيات ديه من غير اى مشاكل من ناحية الامان
والمصيبة الاكبر ان كل بلد دلوقتى بقى ليها مركز اختبارات امان يدافع عن سيارتها
شوفتو الماتيز فوق عملت ازاى
شوفو الكيو كيو اللى هيا الماتيز برضو عاملة ازاى هنا
انا مش عايز اطول عليكم وخاصة ان الموضوع عايز فيديوهات كتير وهتهنج الصفحة
بس عايز اقول ان الحكاية ديه مش مظبوطة اوى وفيه حد بيدحك علينا باستخدام الاختبارات ديه لايهامنا بحاجة غير الحقيقة وللحديث بقية بعد ما اعرف رايكم فى الفيديوهات والموضوع
