[almoez]

السلام عليكم

امبارح رحت المرور في الاسكندريه مرور ابيس كنت رايح اسأل علي اني اضيف لون زياده في الرخصه علشان متمسكش كل شويه

انا من فترة لما اتمسكت رحت اجيب الرخص من مرور محرم بيك ودوخوني وفي الاخر قالولي ابقي رش السقف وتعالي علشان نثبته في الرخصه

المهم فعلا رشيته وطلعت علي مرور ابيس اللي تابع ليه..

اولا قلت اروح اسأل المهندس بتاع الفحص رحت اكلمه بكل احترام وبساله مش بيرد عليا خالص

قلت اسئله كمان مرة برده مردش عليا خالص وانا دمي محروق ومش عايز ازعق المهم وانا واقف جنبه زي التمثال حوالي ربع ساعه رحت سئلته تاني قالي روح ظابط الفحص في مبني الفحص وشاور ليا علي المبني علشان اخد تأشيرة منه (مش فاهم ايه دا ) !!!

رحت لقيت واحد قاعد جوا مش عارف رتبته بس كان علي كتفه 3 نجوم وبيشرب سيجارة المهم بقوله عايز اضيف لون زياده علي العربيه لقيته سكت شويه وبيبص بعصبيه وعمال ينفخ دخان السيجارة وزعق مرة واحده وقالي وانا مالي انا مليش دعوة لسا هسئله اروح لمين قالي روح اسأل هناك قلتله هناك فين قالي روح اسال حتي مش عايز يقولي اسأل فين !!

طلعت علي المهندس بتاع الفحص بس صراحه مردتش اسئله علي حاجه تانيه لقيت واحد عجوز لابن اللبس بتاعهم سئلته قالي ادخل هناك عند الظابط وفعلا دخلت..

لقيته هوا الظابط اللي بيمتحن الناس في الرخصه القياده المهم قلت قشطه اروح اسئله كنت فاكرة باني ادم دخلت عليه بسئله لقيته بص عليه بصه ومرداش يرد نهائي لقيت الست اللي ماسكه الورق قالتلي روح للمهندس قلتله المهندس قالي روح للظابط واديني جيت عمل نفسه ولا كأنه سمع حاجه وبص يمينه وخلاص بصراحه رحت واخد نفسي وسايبه قلت بلاش احرج نفسي اكتر من كده..

ولما رجعت تاني للمهندس قالي صراحه الظباط مشددين محدش يغير اللون !!!

رحت سايب المرور وروحت حاجه بصراحه متعبه وممله وناس مش عارف دي بتعمل ايه هناك اصل المعروف ان مهنه الظابط دي بتبقي مهنه بصرف النظر عن السلطه المفروض يأدي واجبه مش يقرفنا

اسف علي الاطاله وشكراً