السلام عليكم أعضاء المنتدى الكرام
الموضوع ده انا كاتبه مخصوص عشان عارف ان أغلبيتنا بيعانوا منه بسبب بعض الأماكن
و هذه الأماكن هى
1_ أمام فرن العيش : انتوا عارفين الناس بتدور على اول عربية و تحط عليها العيش المولع عشان يبرد و ده ممكن يضر العربية ده غير الرده .
2-أمام المدارس : العيال بعد ما بتخلص اليوم الدراسى و بتطلع برة المدرسة كل اتنين تلاتة يقعدلهم على عربية و اللى يقف على الاكصدام و اللى يخربش بظوافره الكبوت والذى منه .
3-أمام محطة الأوتوبيس : تلاقى المحطة مليانة ناس و مش لقيين مكان يقعدوا فيه و الحل هو أقرب عربية راكنة و ريح عليها يا معلم .
4_محلات الكشرى : حضرتك تيجى نازل فى أمان الله و رايح للعربية تلاقى عليها صلصة و مكرونة و عدس ده غير أكياس الشطه و الدقه .
5_أمام المخازن : العمال يكونوا مطلعين كراتين البضائع الثقيلة و مش قادرين يوطوا و يحطوها على الأرض يقوموا هابدنها على أول عربية فى خلقتهم .
كل ده طبعا بغض النظر عن الوقفات الغير قانونية
و ياريت لو حد عنده إضافة يتفضل بها
