[borio1704]

في رأيي... عشان يبقى عندك صناعة حقيقية للسيارات لازم يبقى عندك حاجتين رئيسيتين

أولا: مصانع مغذية
يعني مصانع تغذي مصنع السيارات بالمكونات اللي العربية بتتعمل منها...

وفي مصر ... الصناعات المغذية أساسا موجودة بشكل بسيط نسبيا وفي أجزاء مش مؤثرة في أداء السيارات.. وأشهر الصناعات المغذية الموجودة في مصر هي:

البطاريات (النسر وكلورايد)
الزجاج (د. جريش)
الكراسي (تاكي)
الكاوتش (النسر)
ضفائر الكهرباء (ليون)


فيه بعض شركات تانية في مجال العفشة وتشكيل المعادن... ولكن إنتاجها محدود وغالبا معتمد على اسطمبات وخطوط إنتاج مستوردة من الخارج

الصناعات المغذية هي الأساس

لسه ناقصنا صناعات كتير... زي مصانع تعمل أجزاء نقل الحركة، والموتور، وأجزاء البلاستيك المختلفة وخراطيم الكاوتش اللي تتحمل الحرارة... ده غير الأجزاء الإلكترونية اللي عمالة تزيد في السيارات

والأهم من ده كله.. مصانع تعمل المادة الخام للمكونات دي... وعندها القدرة على توفير الخامات المتنوعة منها... لأن الحديد الصلب على سبيل المثال فيه آلاف الأنواع ... منها الضعيف ومنها القوي وكمان المرن... كل دول بيستخدمو في العربية


ثانيا: إدارة توظف الكوادر الهندسية المبدعة
وأنا شايف إن دي من أهم الحاجات اللي احنا محتاجنها، يعني لازم يبقى عندنا أكاديميات تخرج لنا ناس بتفهم في أحدث أساليب التصميم والتصنيع.. وأهم حاجة يكون عندهم إبداع.... (مهم قوي موضوع الإبداع ده)... ومصر مليانة بالمبدعين.. بس المهم الإيمان بقدراتهم ووضعهم في مكانهم الصحيح

إحنا عندنا كليات بتطلع ناس زي دي ... زي كلية الفنون التطبيقية.... وأقسام الإنتاج في كليات الهندسة... بس قليل لما تلاقي فيهم حد مبدع لإن طريقة دخول الكليات أساسا معتمدة على المجموع.. مش على القدرات الفعلية وحب مجال التخصص

بس الموضوع ده مش حييجي بين يوم وليلة... لازم ناخد شوية خبرة الأول... وبعدين نبدأ نحط بصمتنا.
بس شوية الخبرة دول المفروض ما ياخدوش وقت كبير... يعني مش أكتر من 10 سنين.. وبعدين بصمتنا لازم تبقى موجودة.. وإلا يبقى المشروع فشل


المهم قبل كل ده... الإرادة على إنجاح المشروع

يعني لما المشروع يشتغل... المصريين لازم ينجوا المشروع عشان يكسب ويقدر يكمل... مش كل واحد يتفزلك ويقول أشتري المستورد عشان هو الأحسن



...