أشكرك يا أستاذ DK.Cupo لإنك فتحت موضوع كنت عايز أتكلم عليه من زمان
بس كنت عايز أؤكد على كذا حاجة
ضبط الإضاءة مهم جدا
أولا لضمان سلامتك وسلامة الناس في الشارع (لو شايف الطريق والناس كويس احتمال الحوادث حيقل)
ثانيا لإن
قانون المرور في أي دولة في العالم... بما فيهم مصر.... بيلزمك إنك تنور النور من أول ما المغرب يأذن... ولو ما نورتش تاخد مخالفة.
إضاءة الأنوار الأمامية لها شكل يشبه الشكل التالي
النور متصمم بالشكل ده بحيث إن الجهة اليمين تنور أعلى من الشمال، بحيث إن الجهة الشمال ما تبقاش أعلى من مستوى كبوت العربية المقابلة، بالطريقة دي عُمر ما النور حييجي في وشك
طيب إيه الغرض من الإضاءة العالية على اليمين؟؟
عشان تنور على العلامات المرورية اللي ممكن تكون في الطريق (وعادة بتكون على يمين الطريق)، وجرب كدة إنك تسافر على الصحراوي بالليل وتشوف العلامات منورة قوي كده ليه
على فكرة ...
الإضاءة بتبقى عالية على اليمين في العربيات اللي دركسيونها شمال... وعلى الشمال في العربية اللي دركسيونها يمين لإن اتجاه السير معكوس
بس علشان نضمن إن إضاءة العربية مضبوطة لازم نتأكد من كذا حاجة مهمة
أولا: إن اللمبة مقاسها مناسب والفتيل بتاعها موجود في البؤرة الصحيحة اللي الفانوس متصمم عليه، يعني نجيب نفس مقاس اللمبة الأصلية، لا أطول ولا أقصر
ثانيا: اللمبة متركبة في مكانها صح ، برضو عشان موضوع البؤرة
ثالثا: الفانوس نفسه متركب في مكانه مضبوط
رابعا: نتأكد من إن اتجاهات الفانوس مظبوطة، لإن الفانوس في مسمارين للرجلاج (في الفانوس من ورا)... واحد للحركة الرأسية والتاني للحركة الأفقية
خامسا: العربيات اللي فيها إمكانية ظبط ارتفاع نور الفوانيس من التابلوه (أوتوماتيك) لازم يبقى ارتفاع النور متناسق مع كمية الحمولة اللي في العربية، خصوصا الحمولة الخلفية، يعني كل ما العربية كانت محملة لازم ننزل الفوانيس لتحت
سادسا: الفانوس المتركب بينور عالي على اليمين.. مش على الشمال... عشان فيه فوانيس استعمال موجودة في السوق بتبقى جاية من بلدان اتجاه الدركسيون في على اليمين (زي انجلترا واليابان والهند وأستراليا)
طب إزاي نظبط النور؟؟؟؟؟
زي ما الأستاذ DK.Cupo كتب :
1- اختار مكان يكون الأرضية فيه مستوية (جراج عمارة مثلا) وقرب وش العربية من الحيطة قوي
2- لما تنور النور حيكون فيه بقعتين نور على الحيطة، علم علامة + عند أكتر منطقة مضيئة في كل بقعة
3- ابعد بالعربية لورا مساقة 7م تقريبا، المفروض تلاقي نقطة بداية المثلث في نص علامة +
زي كدة:
وعموما، لازم برضوا تتأكد بنفسك، المفروض إن النور يبقى في حدود مستوى اكصدام العربيات اللي ماشية قدامك على مسافة حوالي 10 - 15 م
...