رد: مصممة حانات وفنادق تصبح أول امرأة تصمم مسجداً بتركيا
هو يمكن يكون كلامي غريب شويه ....
لكن حتكلم بنظره معماريه صرفه ....
أي منشاء او مبنى له وظيفه معينه ... الوظيفه دي بيتم تحويلها الي مجموعه من العلاقات الفراغيه ...او ما يطلق عليه ال zoning
يعني مثلا لما نيجي نصمم شقه .. نقول ان الفراغات ريسبشن - مطبخ - نوم - .... الخ
نعمل اسكتش هلامي نوزع عليه الفراغات دي ... بحيث يكون المطبخ قريب من الريسبشن و اود النوم مع بعض .. وكده ..
وبالتالي نفس القصه للمسجد ... مداخل - ميضاه - قبله - ......
لكن الاهم من الزونينج هو الكونسبت او المفهوم التصميمي ... ان العلاقات دي يكون وراها فكره قويه او ابعاد انسانيه ... او انعكاس ثقافي ... ودي بترتبط باحاسيس و ادراك البشر للفراغات و الكتل
وممكن الابداع التصميمي يوصل لاعطاء الشعور بأحاسيس مختلفه ... بالسكينه او الخشوع مثلا ... زي مسجد السلطان حسن ( عن طريق عمل مدخل ضيق مظلم وبعدين مفاجاءه الصحن ) ...
نيجي بقى لنقطه مهمه جدا .... التصميم الداخلي ... ودي محتاجه دراسه ووعي والمام بالتفاصيل و ثقافه عاليه .. وجانب فني و حسي عالي جدا ...
فللأسف الشديد ... تصميم البارات بالذات بيكون المصممين ليها على اعلا مستويات الالمام بالمواد و التفاصيل و النمنمه و الخامات ....
العماره الاسلاميه (خاصه المساجد ) في البدايه قامت على عماره الكنائس مع اخذ ما يتلائم مع العقيده و ابعاد ما يخالفها .. زي التجسيم و تحويل الرسومات الي زخارف هندسيه ...
وابسط دليل إن مسجد ايه صوفيا بتركيا ( الشبيه بمسجد القلعه عندنا ) هو اساسا كنيسه سانتا صوفيا و تم تحويله لمسجد !!
ولو ركزنا حنلاقي تشابه كبير في التفاصيل الداخليه بين الكنائس و المساجد ...
اسف على الاطاله و الرغي ... لكن حاولت اختصر علشان اوصل للنقطه دي ....
للأسف .... ممكن جدا مصممه الحانات تصمم مسجد رائع من الناحيه التصميميه و الزخارف و التفاصيل و العلاقات الفراغيه ....
لأن تعامل المعماري مع المسجد كبناء هو لتحقيق الوظيفه (الصلاه) و تحقيق البعد الانساني ( الخشوع و السكينه ) والربط بالابعاد الدينيه والثقافيه للمصلين
انا مش بحاول اتفلسف بكلامي ... لكن هو فعلا موضوع الكلام فيه صعب جدا ...
لكن العماره الاسلاميه ... مش معناها انها عماره متدينه ... لكن معناه انها عماره مرتبطه بتعاليم الدين الاسلامي
وفي النهايه ... العبره بأهل المساجد ... مش باللي بنوها
اللهم اني ظلمت نفسي فأغفر لي
__________________
من تواضع لله رفعه The ultimate car would be designed by Italians engineered by Germans built by Japanese &
|