[ahmed_eng2001]

المشاركة الأصلية كتبت بواسطة تامر ديزل شكرا على المقالة الجميلة يا استاذ احمد ولكن ليا بعض التعليقات ارجوا ان نتناقش فيها ... طبعا دلوقتي من خلال المقال تم تصنيف الاغلبية الصامته او نسميها اي اسم او الناس الغير مشتركه في التظاهرات الاخيرة او الغير داعمه لها على انهم قوم فرعون .. المقال بيقول كده .. وقوم موسى هما المتظاهرين والمؤيدين لهم .. كمان فيه اسقاطه جميله هيا ان الاعلام الفضائي الخاص له عذره ومبرره في اللي بيعمله( تسخين وتهييج ) لانه بيواجه الفرعون بسحره الي هوا الاعلام الحكومي السؤال دلوقتي : ايه المطلوب واحنا نعمله ؟ بس بعيد عن الشعارات .. خلاص المقال بيقول ان اللي المجلس العسكري فرعون يبقى ماتستناش منهم غير كل شر .. انا سؤالي احنا كشعب ايه المطلوب في شكل نقاط محدده... هبسطهالك : ثورة يوم 25 يناير 2012 ... اسقاط المجلس العسكري ... وبعد كده الخطوه اللي بعد كده ايه .. فهمني يمكن اقتنع واغير رايي ( الذليل بيحب الذل , بيحب اسياده من العسكر وفلوووول وخنوع ومافيش نخوه والعمي وعدم الفهم وجميع مسميات الحيوانات وغباء وذل تاني وخضوع وخنوع تاني .. ) اللي عنده شتمه غير دول يدخل يقولها اللي مافيش عنده جديد يسكت احسن...المقال اصلا مطلع الشعب من اتباع فرعون بالعافيه لا وكمان فاسقين يعني المقال قايم بالواجب وزياده شوفوا حاجه تانيه اعملوها .... اللي عنده تصور عملي نعمل ايه يقنعنا بيه من غير شعارات ... يمكن نقتنع ...

السلام عليكم
انا مش موافق على بعض الحاجات المذكورة فى المقال السابق و على مقال و رد حضرتك برضو , اهم حاجة من وجهة نظرى ..... اننا منتخانقش ... و منضربش فى بعض .. نختلف براحتنا ... ناس فى التحرير و ناس فى العباسية ... مش مشكلة ... بس المشكلة لو اتخانقنا و بدأنا نضرب فى بعض

اما عن موضوع المقالة .. اعتقد المقالة كانت بتتكلم عن حسنى مبارك و بتشبه بينه و بين فرعون و الظريف فى الامر ان الناس بتعتقد المقالة دى عن المجلس العسكرى نظرا للتشابه بين حسنى مبارك و المجلس العسكرى انا مش بقصد حضرتك ... انا بتكلم عن ناس تانية ( اصدقائى )

اما عن المجلس العسكرى .... انا كنت من المؤيدين ليه ... بس الى اكتشفته بعد كده ان دول الناس الى اتربوا على ايد مبارك .. و تحت رعايته و بعدين الجيش من مؤسسات الدولة .... و كل مؤسسات الدولة فيها فساد .... بس فساد الجيش مختلف شوية فى ان شكله مختلف ... و ممكن اذكر لحضرتك امثلة كثيرة جدا لحضرتك .... اما ان الجيش بيحمى مصر و الكلام ده ... فانا لا استطيع ان انكر هدا .. و فيه ظباط و عساكر فعلا عندهم استعداد يموتوا ببساطة علشان مصر

الجيش هو الى حمى الثورة ... انا عندى شك كبير فى الموضوع ده .... من الاحداث الى بتحصل دلوقتى ... اعتقد ان المجلس العسكرى اختلف مع مبارك فى اخر ايامه و ده الى خلاه يقلب على مبارك .. مش حبا فى الثورة ولا دفاعا عن شعب مصر الى كان بيموت فى ميدان التحرير

ايه الى ممكن يحصل ؟؟....

ده الى الناس قالوه من ايام الثورة الاولى فى يناير ... مجلس رئاسى انتقالى ... الجيش بيبقى ليه ممثل فى المجلس ده ... النتيجة .... الجيش مش حيبقالوا الانفراد بالقرارات ... و بيبقى عليه تأمين البلد .. دى وظيفته الاساسية .. و القرارات بيبقى ليه راى فيها .. مش الراى كله للجيش
طيب المجلس العسكرى مش حيعمل كده .. ليه ؟؟ علشان المجلس الرئاسى مش حيتفق و الجيش هو الى بيخاف على مصر و المجلس الرئاسى بتاع مصلحته ...ممكن , يبقى الحل ان مجلس الشعب و رئيسه يتولوا السلطة من المجلس العسكرى

تانى حاجة .. انتخابات رئاسية ان شاء الله

تالت حاجة و دى اهم ...الاتفاق على ان المصلحة واحدة ... يمكن الطرق مختلفة .. بس المصلحة واحدة ... بمعنى ... حضرتك مش عاوز تنزل التحرير .. متنزلش ... عاوز تنزل العباسية .. انزل ... تشرح للناس وجهة نظرك .. اتفضل .. بس متحاولش تقلل من شان الغير ( انا عارف ان حضرتك مش كدة ) انا بتكلم على العموم ... و متحاولش تطلع الطرف التانى عملاء و فلول و الكلام الى اكتشفنا انه مش مظبوط اوى ده .... احنا فى الاخر ... مصريين