السلام عليكم ورحمة الله وبركاته
من حوالى اسبوع لاحظت ان كاوتش الكبالن بيسرب زيت من عند الفتيس وان فيه كاوتشه من عند العجل مقطوعه وهتبداء تدخل تراب للكوبلن
و للعلم لو انا كنت طنشتها كانت الكبالن باظت خالص
المهم رحت النهارده عن الميكانيكى بتاعى واللى دايما بيعملى اى حاجه فى العربيه
واتفقنا على السعر وعلى الحجات اللى هتتعمل
واتفقنا
اننا نجيب الكوتشتين اللى من عند الفتيس والكوتشتين اللى من عند نحية العجل يبقى المجموع 4 كاوتشات وطبعا علبة شحم وبنزين
واتفقنا على السعر كل حاجه 110
وبداء الشغل
طبعا فك المسامير بتاعت العجل ورفع العربيه جامد علشان منضطرش نحط زيت فتيس كتير وطبعا راح شايل الكبالن بالعمودين بتوعهوم على ما اتذكر اسمهم عمود الكرنك او عمود الكردان على ما اتذكر وطبعا العربيه نزلت بتاع كيلو زيت وراح ماسك الكبالن بالعمودين بتوعهم راح شايل الكوتشات القديمه ورماها ورح فاصل العمودين عن الكوبلنين وراح الاول فى العمودين شايل كل الوساخه اللى عليهم وراح غاسل بالبنزين كويس مع التنظيف بالفرشاة جيدا لغاية مرجعوا جداد
وراح ماسك الكبالن وراح غسلها كويس جدا بالبنزين و ينضفها كويس بالفرشاه لغاية ما بردوا رجعوا جداد راح ماسك الشحم وراح مالى الكوبلن كله شحم ونفس الكلام فى الكوبلن التانى وراح مركب الكوتشتين فى العمود اللى بيركب فيه الكوبلن وراح مركب كل كوبلن فى كل عمود وراح بعد مار كب الكبالن فى العمود بتاعم راح حاطط شحم تانى وراح قافل عند كوتشات الكبالن الى من نحية العجل بافيز من كل نحية فى الكوتشه لضمان ان كله يبقة تمام ونفس الكلام فى الكوبلن التانى و راح مركب العمودين بالكبالن تانى فى الفتيس وركب كل حاجه تانى و الكوتش ركب واتربط الصوميل تانى وراح منزل العربيه على الارض تانى وبس كده
طبعا الموضوع خد وقت 3 ساعات
ومصاريف
110 لعم رفعت الميكانيكى وهو اللى جاب كل حاجه بنزين وكوتشات و افيزات وشحم وكل حاجه كل حاجه هو اللى جابها
ورحت بعد ما مشيت زودت زيت فتيس ب 20 جنية
يبقى كله كله 130 جنية
مع العلم انى كنت مشترى فلتر بنزين و 4 بوجيهات بوسنة سن قصير
وركبهم ليا ومخدش حاجه على تركيبهم
وبجد راجل نضيف جدا جدا جدا
وشغله تعملة مره واحده وتستريح بعدها
ويستاهل كل قرش بياخده
مع العلم عم رفعت ده عنده 3 اولاد كلهم بسم الله ما شاء الله تعليم عالى وكلهم شغالين معاه وبيبقوا فهمين الحاجه مش يبقوا تيجوا تكلمهم يبقوا البنجو لاحس دماغهم زى الميكانيكيه التانين بتتعامل مع واحد عنده ضمير ومتعلم وفاهم وقد يكون غالى شوية بس زى ما بقولكم الحاجه تتعمل مره وحده وبس
ومثلا لو انت عاوز تعمل عمرة بيقولك على كل حاجه بصراحه ويحاول يعملك الحل الارخص والاحسن ليك مثلا يشوف الماتور بتاعك لقاه عاوز نص عمرة او شغل خفيف يقولك نعمله لاقاه بقى عاوز حاجات كتير وشغل قرف وكده يقولك انا ممكن اعملك العمره بتعته بس الفكره ان احنا مش هنلاقى الحاجات وقطع الغيار الاصلية فالافضل ليك ننزل مع بعض ونجيب ماتور من عزبة شلبى والماتور القديم تبيعه انت ويقولك على مميزات وعيوب كل حاجه قبل ما تعملها بجد الله يكرمه وانا والله ماليش اى مصلحه منه خالص انى بقول عليه كده بس انا بقول كده علشان فعلا الراجل ده يستحق انى اقول عليه كده
و
السلام عليكم ورحمة الله وبركاته