[abu_ruqayyah]

من وجهة نظرى الشخصية يا جماعة ....ان موضوع المؤامرة دا موجود موجود واعتقد ان الكل مش مختلف عليه بمعنى ان كلنا عارفين ان دول كتيرة متربصة بينا والكلام دا حتى قبل ثورة يناير وطول عمر مصر وهى بتعانى من المؤامرات وبتخرج منها بفضل من ربنا ........اما بقي المؤامرة اللى الكل بيتكلم عليها دلوقتى فهى بتكون عبارة عن مجرد تكهنات سياسية من سياسيين و محلليل استراتيجيين بيتنبأوا بالاستدلال والاستقراء من خلال الاحداث والوضع الحالى لما يمكن ان يترتب على هذه الاحداث فيما بعد.............فى حاجة كمان الا وهى ليه مش بيتم القبض على الناس دي ولية مش بيتم كشف الناس دي والكلام اللى من الطبيعي انه يدور فى دماغ العامة فانأ بقول ان وجهة نظرى فى الموضوع دا هى دواعى امنية بحتة بمعنى ان الجهات المختصة بتتابع هؤلاء الاشخاص وبترصدهم لكن مش فى مصلحة البلد انها تكشفهم وهديكم مثال : لما بيبقي فى واحد شغال فتنة وشغال اعمال تخريبية وهاتك يا تويتر وهاتك يافيس و لافتات و نشر اشاعات وحاجات مضرة بمصلحة البلد ( طبعا يستثنى الشباب البرئ المخلص للوطن ) الجهات الامنية بترصده لانها لو راحت قبضت عليه مش هتعرف مين الشبكة بتاعته ومين رئيسها وبيشتغل لحساب مين ، ولازم يا جدعان تعرفوا

ان كل واحد بيشتغل لحساب دولة تانية مش بيكون لوحده دا بيكون فى داخل شبكة ( ويمكن كمان يجهل انه ترس ضمن ماتور كبير ) لكن المهم ان بيكون فى شبكة ليها قائد بيحركهم والقائد دا بيكون فوقيه وسيط الوسيط دا اللى بيجيبله المطلوب وبياخد منه الشغل ( وعلى فكرة دى حاجات كنت ناوى اكتبها فى موضوعى اسرار مش اسرار ) المهم ان القبض على عنصر منغير معرفة مصدر الخيط يعتبر خطأ ولابد من اول امساك طرف الخيط ان تتم متابعة كل ماله علاقة به ( يعنى الشاب دا اتجند ازاى وهل هو يعرف ولا ما يعرفش انه بيشتغل لحساب دولة تانية ومين اللى بيدربه وكيفية التدريب و معرفة الشبكة وكيفية ادارتها و افرادها وهكذا الموضوع مش هخوض فيه اكتر من كدا عشان ما نتعبش وهبقي احطه فى موضوعى ان شاء الله )
بس اللى عايز اقوله ان الجيش بيغلط !!!! اه طبعا بيغلط ........طيب والثوار بيغلطوا !!!! اه طبعا بيغلطوا ..........والثوار عندهم حق فى حاجات كتير والجيش عنده حق فى حاجات كتير ......طيب ايه الحل !؟ الحل اننا نلتقى فى نقطة وسط ما بين الاتنين ونحاول اننا نقدم مصلحة الوطن على كل شيء ( ولو انا بتخانق مع اخويا وانا عارف ومتأكد انى صح وهو غلط بس الخناقة بتاعتنا دي بترفع الضغط والسكر عن امى ودخلت فى غيبوبة ......فانا هقوله انت عندك حق بس تعالى نشيل امنا ونروح بيها اقرب مستشفي وانت اللى هتسوق او انا اللى هسوق مش هتفرق لكن المهم نلحقها )



اللهم احمى مصر وشعب مصر