لاول مرة صيانة اتو ايجيب ابورواش
الموقع: ابورواش، طريق اسكندرية الصحرواى، بعد منزل المحور بحوالى 500 متر تدخل اول يمين وتمشى كيلو هتلاقى المركز على اليمين بعد مدرسة بريليانس بحوال 300 متر.
المكان: لسة فية اجزاء تحت التشطيب خصوصاً واجهة المبنى (لسة مواقع بيع قطع الغيار وبيع السيارات تحت التشطيب) وبالتالى توقع وجود اتربة بكثرة فى المكان،
المدخل للموقع شيك: ويتم استقبالك فى الموقف من موظفين ومساعدك فى ركن السيارة وارشادك إلى موظف الاستقبال،
موظف الاستقبال: مجهز اذون العربيات الحاجزة مكتوبة جاهزة لتوفير الوقت، ويعطيك رقم ويطلب منك الانتظار فى الاستقبال حتى ظهور رقمك على الشاشة مصحوبا برقم مهندس الخدمة.
رقمى كان C03 واعتقد ان الحرف الاول يحدد نوع الخدمة المطلوبة (صيانة دورية، طارئة، تصليح ...الخ) والرقم هو دورك وبالتالى مكنش فية غير 3 عربيات بما فيهم انا (اكس تريل، وباترول وانا)
المهندس كان غاية فى التعاون وشرح كل شئ وبعدين خرجنا لمعاينة السيارة وجاب معاة – شنطة لحفظ المتعلقات (مش بلاستيك، ودى حركة كويسة)، وكيس للدريكسيون، وكيس للكرسى.
قام بالكشف الظاهرى على السيارة وكتابة اى ملاحظة، وشرح الخدمة والتكلفة (ودى هنرجعلها فى الاخر)
وبعدين حدد معاد الانتهاء التقديرى وان فية راحة ساعة من وبالتالى وقت استلام السيارة هيكون حوالى الساعة واحدة، وقام بارشادى إلى قاعة الانتظار والتى مؤسسة بشكل جيد وفية مكان للعب الاطفال وكفاتيريا مع اعطائى كوبون لمشروبين ووجبة خفيفة مجاناً (الكوبون موجود لانى رجعت الشغل ومشربتش حاجة وصالح للاستخدام)
مكان الانتظار عبارة عن صالة كبيرة بها مكان متسع للعملاء والمهم نقطتين: الاولى: زجاج كبير بيفصل بين الصالة ومكان خدمة السيارة وبالتالى انت شايف كل حاجة بتحصل لعربيتك. انا لحقتة قبل ميزود الكاوتش هواء لانى حاطط نيتروجين. الثانية: وجود شاشة توضح مكان السيارة فى مناطق الخدمة (استلام، صيانة، غسيل، تسليم) مع وقت دخولها كل منطقة ودى نقطة جديدة وجيدة جداً.
رجعت شغلى تانى، ووصلنى اتصال ان العربية خلصت وتعالى استلمها، وصلت لقيت العربية مركونة فى ممر الانتطار ودخلت للمهندس وقام بشرح تفصيلى للفاتورة وتكلفة الخدمة وقام معايا لحد الخزينة وتم الحساب.
التكلفة : علشان الافتتاح تم الحصول على خصم للمصنعية للصيانة الدورية وتمن الفلتر وبالتالى دفعت تمن الزيت فقط (248 جنية بالضريبة).
-الزيت كان توتال بس فية امكانية انك تحط الزيت الى انت عايزة
-سوف يتم تشغيل انترنيت والعاب للاطفال وفتح دور تانى لمنطقة الاستراحة.
المحصلة تجربة جيدة ولاكن لايمكن التأكد منها إلا مع بداية الزحام لان كان فية 3 عربيات فقط فى الصيانة وبالتالى كل واحد كان واخد حقة على الاخر.
السئ: الشماسة ضاعت ، لايوجد تصريح خروج سيارة وبالتالى لو السيارة اتسرقت سهل الخروج بيها – هما بختفظوا بالمفاتيح فى مكان تانى بس برضة زيادة امان، مدخل الاستقبال محتاج اعادة ترتيب لان موقع مكتب الاستقبال بعد المدخل مربك للعميل.
للاسف لم اقم بالتقاط صور كثيرة للموقع
والسلام ختام
|