رد: سيارات للبيع لمصر ببلاش
بحكم ظروف حادثة حصلتلى فى وصادفت ان ليا معارف فى نفس الوقت ده جابوا بضاعة عربيات من بره هحاول الخص الأتى:
1- صاحب الموضوع بيعرض بضاعة لسلع رائجة فى مصر و فى كتير يعرفوا تفاصيلها.
2- العربيات بتتبعت من هناك بناء على طلبك, النوع و الكمية و طريقة تقطيع السيارة و عاوز ايه بضبط يتبعتلك من السيارة (النصفين كاملين - نصف أمامى فقط - أجزاء العربية متفككة) و طبعا بتفرق على حسب طبيعة التجار البتتعامل معاهم هناك.
3- الغرض الأساسى هوا تقطيع العربيات لاستخدامها فى محلات قطع غيار الاستيراد المنتشرة فى الحرفيين و طبعا بضع المناطق الأخرى.
4- الغرض الأخر هو وجود عربيات حوادث من الصعب تصليحها و رجوعها لحالتها, فبيتم شراء العربية متقطعة نصفين بالطريقة البتفضلها ده لو جيالك مخصوص, و بيتم تلحيمها هنا و نقل الموتور بورقه و نقل رقم الشاسيه.
5- الموضوع ده اساسا غير قانونى, و الأعرفو ان ليه مخرج قانونى واحد و هوا انك تودى العربية الحادثة لمرور الدراسة تقريبا و بيتم فحصها عن طريق خبير و لو غير نافع تصليحها بيأشرلك بتركيب نصف أمامى للسيارة بشرط حفر رقم الشاسيه على القايم و طبعا كده العربية مشمومة و يكاد من المستحيل اعادة بيعها (ديه معلومات متجمعة و ليست عن تجربة).
6- أعتقد مش من السهل اكتشاف لحام رقم الشاسيه لأن من ما ريت به فى ترخيص سياراتى السابقة سواء مدينة نصر أو النزهة (سيارات سليمة طبعا انا بصراحة اشتريت دماغى و مخدتش التجربة) لقيت فنيين الفحص مش اد المستوى و أعتقد مش هيكتشفوا الموضوع (الا لو لون السيارة خارج او داخل مختلف عن الفى الرخصة و ساعتها ده ممكن يخليه يركز شوية)
7- السمعتو ان عربيات كتيير فى بلدنا ماشية انصاص خصوصا الالمانى و عشان كده عند شرائك لسيارة المانى لازم حد متخصص سمكرة و دوكو يبص عليها للتأكد من خلوها من اى لحومات فى الشاسيه و دهان الدواخل و عموما انا كنت عامل حادثة توتال لوس بسيارة بورا و كان فى تهافت على شرائها و العربية اتباعت و اتلحمت و خرجت عادى جدا.
8- جمرك بورسعيد اسهل فى التعامل و حساب الضرائب و خروج السيارات المتقطعة عن جمرك الاسكندرية, و أغلبية التجار بيبعتوا على بورسعيد و لازم مستخلص اليخرجلك البضاعة و يفضل يجيلك عن طريق حد معرفة و مجربه عشان ميشتغلكش و عشان تضمن انو يخرجلك البضاعة (الفرش الداخلى أعتقد دخوله صعب, و اسمع ان الكاوتشات و الفوانيس ممنوع) بس ده ميمنعش ان الحاجات ديه كلها بتدخل عادى.
9- نصيحة: لو ملكش حد بره و كمان حد هنا فاهم فى الحوارات ديه و هيعرف يخرج البضاعة و فاهم الأسعار كويس و عارف حسبة الشراء و الشحن و البيع و الربحية, يبقى ابعد عن الموضوع لأنه مكلف و متعب و ممكن يلبسك فلوس, ياما تشتغل مع حد تتعلم منو قبل متدخل بفلوسك أو لوحدك.
|