[dr.wael7yran]

طيب بعض الحقائق الطبية ..
1- لما بيجيلينا المصاب بالبلي بتاع الخرطوش بنعمل اشعة على الصدر و البطن و اذا كان مفيهموش حاجة بنقول للعيان مبروك عليك العشرين بلية ( على الاقل ) اللي في جسمك موش هنقدر نشيلهم و هتفضل عايش بيهم طول عمرك مشوهين جسمك .. ولو لقينا حاجة اخترقت جسمه يبقى لازم يعمل عملية استكشاف كبرى و يا يعدي منها يا ميعديش ..

2- في اكتر من 40 حالة في القصر العيني جالهم تشنجات بعد التعرض للغاز المستخدم في القنابل و معظم حالات الوفاة ناتجة عن الاختناق بهذا الغاز .. و في تحقيق بيتم بخصوص الغاز ده و لو طلع غاز اعصاب او غاز سام هتبقى ليلة سودة على اللي فكر يستخدمه ..

3- من 500 مصاب يوم الاثنين صباحا بالمستشفى الميداني بالكنيسة كان في حوالي 30 شاب فقدوا عيونهم .. حادثة او نيشان او غيره .. بس خلاص عيونهم اتصفت و دي المحصلة النهائية ..

4- اعتقد - و حضرتك ممكن تصحح لي المعلومة دي - انه العساكر بيقى عندهم القدرة على تحديد مكان الاصابة في الارجل او فوق في الوجه و الصدر .. و انا لاحظت كده يوم 28 يناير .. لأنه قبل الساعة 3 ظهرا يومها معظم ان لم يكن كل المصابين كانت الاصابات في الارجل .. و بعد الساعة 3 معظم الاصابات كانت في الراس او في الصدر ..

5- معلومة من رئيس ائتلاف اطباء الثورة .. اكد ها ائتلاف اطباء بلا حقوق انه عدد المصابين وصل لاكتر من 4500 مصاب موش 1800 مصاب كما يذاع في التليفزيون المصري ..

و حسبنا الله و نعم الوكيل ..