[تامر ديزل]

الرساله دي لزملائي الاعزاء اعضاء حزب الاستقرار واللي بيسمينا البعض حزب الكنبه : انا عارف ان احنا بنحب الاستقرار وبنحب الشغل وخايفين على البلد وخايفين من الفوضى ولكن : انتوا زعلانين ليه دلوقتي ؟ خايفين ان المجلس العسكري يتنحى وتبقى فوضى ؟
ما تخافوش ماهوا احنا دلوقتي في فوضى برضه وبعدين لازم تجهزوا نفسكوا نفسيا للمرحلة دي لانها بقت امر واقع التحرير مش هيتفض الا لما المشير يتنحى والمجلس العسكري يسيب السلطه تماما والبرادعي بيه يمسك البلد وده مطلب عادي ايه المشكله ماهوا اساسا دي مش شغلانة الجيش انه يحكم البلد
انتوا خايفين الجيش ينهار اطمنوا مش ها يحصل الجيش المصري كبير اوي واللي خدم فيه عارف الكلام ده يبقى خايفين من البلطجيه والعصابات اللي مش هتلاقي حد يلمها
والله بقى دي شغلانة البيه البرادعي ورجالته نشوف بقى هيرجع الامن ازاي ؟
محدش يقلق ياجماعه مصر دي كبيره اوي ولا اي حد يقدر يوقعها هوا غاية اللي هيحصل شوية فوضى وعدم استقرار مؤقت وبعدين احنا بطبعنا كشعب بيحب يشتغل وبيحب الاستقرار هنخلي البلد تستقر