[مستجدة]

السلام عليكم
انا كنت بدور عن معلومات عن الافانزا بس لقيت ناس زعلانه منها قوى يعنى و يقولوا عار على التويوتا
و ناس تانية مجربها و قالت ممتازة جدا و بتشكر فيها .
زوجى عايز يجيب النترا اوتوماتيك و انا بقله متعمليش فيها افندى و هات عربية تنفعك
هو عنده بيجو 504
و طبعا حالتها تقطع القلب كمكانيكا
عايز واحد مخاوى عشان يسوقها و طبعا لأنه عشان يقومها و يضبط الحاجات التعبانه فيها محتاج الافات .

المهم هو مستحملها عشان بيقول ديه تشيل نص طن بصبعها الصغير .
و عالية .
هو مهندس زراعى و بيطلع مشاريع فى بلبيس و حتت كثير
و احيانا بيوفر ثمن النقل و بيشيل فى العربية حاجات السباكة بتاعتهم ديه و احيانا لو مشروع صغير بينقل هو العمال معاه .

ده غير لما نسافر بناخد البيت كله على شبكة العربية
و اصلا حماتى بتسافر معانا .

و كمان عنده ارض فى المنصورية و بيحمل الليمون يومين فى الاسبوع يوديه السوق .

انا بقله بدل ما تجيب النترا و ترجع تانى لتيته الحاجة البيجو .
هات افانزا و تبقى تقضى مصلحة .

هو مركز على انه بيشتغل فى المطار 5 ايام فى الاسبوع و المشوار من المعادى للمطار كبير و خاصة فى الزحمة فكان بيفكر فى عربية صغيرة زى الجيتس .
بس لما جرب الفرنا لفترة حس انها عربية لعبة و انه قاعد على الارض و انها بسكوته خالص و مش حمل البلطجة اللى بيعملها مع البيجو .

فكر فى التيجو
بس قالوا له سيبك منها خالص .

بصراحة انا مفيش مرة سمع فيها كلامى الا لما ندم


و جوز صحبتى دايما بيقول اللى يسمع للستات ميفلحش .
بس بجد انا حاسة انها مناسبة ليه جدا
و عجبانى اكثر من الكيا اللى برضه بيفكر فيه .
و فيه ناس هنا بتقول لوجان و انا بصراحة معرفش عنها حاجة .
و حاسة ان التويوتا انسب .
و لا رأيكم ايه