[ahmed el gendy]

الحادثه دي طبعا كانت العيديه بتاعتي كانت يوم الاربع قبل العيد مباشره طبعا لان العربيه كانت متكسره كان عيد خنيق ومخرجتش مع اصحابي ولا عملت اي حاجه منه لله اللي كان السبب
باختصار كنت رايح من منيا القمح ( مركز تابع للشرقيه يقع بين بنها والزقازيق )للزقازيق المهم ما كنتش ماشي علي سرعه اصلا انا تقريبا كنت 80 او 90 بالكتير قوووووي يادوب كنت لسه خارج من قلب البلد فما لحقتش اجيب سرعه ولسه داخلين علي الطريق السريع كنت ماشي ورا ميكروباص والميكروباص وانا وراه طبعا كنا بنعدي ميني باص المهم لقيت ف ثانيه الميكروباص راح كاسر علي الميني باص بس ربنا ستر كان هينفخه من ورا وف نفس اللحظه اللي الميكروباص كسر ع الميني باص لقيت قدامي مفيش متر ونص توك توك جاي مخالف مع العلم الطريق رايح لوحده وجاي لوحده وفيه زي جزيره ف النص يعني هو له طريقه وانا ليا طريقي المهم التوك توك كان جاي مخالف ومش علي التراب اللي بيبقي بره الرصيف لا دا جاي جنب الجزيره اللي ف نص الطريق طبعا بتاع الميكروباص كسر علي الميني باص عشان لقي التوك توك اللي فاجأه بالمخالف بس الميكروباص كان تقريبا عدي الميني باص ولو بحته صغيره انا بقي كنت جنب الميني باص بالضبط و التوك توك جاي لي مخالف والمسافه زي ما قلت مفيش متر وشويه حاولت بقدر الامكان افاديه كسرت يمين علي اخري واكتر من كده كنت خبطت ف الميني باص بالجنب وطبعا المسافه كانت باعرض ما تجيبش ميني باص وعربيتي وتوك توك جاي يدلع ف المخالف
طبعا خبطت ف التوك توك منم الشمال وبعد ما خبطت ف التوك توك العربيه لفت بالعرض يا رجاله ورحنا مخبوطين ف السور اللي ف نص الطريق اللي بيفصل بين اللي رايح واللي راجع
اوطبعا غيرت فيها رفرف شمال وفوانيس وشمال واكصدام ومرايه شمال والباب بتاعي كان اتعجن بس السمكري قالي هيتعدل عادي
الراجل بقي اللي كان سايق التوك توك راحل نازل بنفسه ونايم ع الرصيف وبيعمل انه اتخبط جامد رحت له قعدت يجي دقيقتين تلاته جنبه اشوفه فيه ايه ما لقتش غير بالضبط نقطتين دم من دماغه قلت له بص انا اتطمنت عليك انت تمام قوملي بقي تعالالي اللالي يا حبيبي تعالالي دلوقتي انت غلطان مين هيصلح تمن الحاجات اللي اتكسرت ف عربيتي دي قال بص يا باشا اناراجل علي باب الله وكل واحد يصلح حاجته قلت له خلاص البوكس هو اللي يجيب لي حقي قالي خليه ينفعك ومش هتاخد حاجه برده حسيت بقي انه بيبلطج عليا قلت له طب انا عارف اني مش هاخد حاجه بس زي ما ضرتني هاضرك وكلمت البوكس وعملنا محضر ورحت النيابه والقاضي قالي خد عربيتك صلحها والتوك توك يروح المرور يتحجز ويتفحص من هيئه السلامه ف المرور وتتسحب الرخصه بتاعته واهم حاجه يدفع مخالفه تغيير اتجاه السير يعني خيطه وهيدخل له ف يجي 2000 جنيه ع الاقل طب ما كان دفع نصهم حتي ليا وانا كنت اتنازلت عن الباقي واستعوضت ربنا بس بيني وبينكم انا مبحبش ائزي حد بس بلطجته هي اللي شعللتني بس فيه ناس كتير استغلطتني ف الحته دي بيقولولي ياعم انت كده كده كنت هتصلح عربيتك ومش هتاخد فلوس خلاص كنت سامحته وسيبته ياكل عيش يا تري اللي عملته صح ولا كان غلط لاني انا نفسي ضمير تعبني بعد ما هديت وقعدت لوحدي